२२ माघ /अर्थ र व्यापार - हिमालयन उर्जा विकास कम्पनीले सर्वसाधारणको लागि १४ लाख ८५ हजार कित्ता प्राथमिक शेयर निष्काशन गर्ने अनुमति प्राप्त गरेको छ । नेपाल धितोपत्र बोर्डले कम्पनीलाई जम्मा चुक्ता पूँजीको १५ प्रतिशत अर्थात १४ करोड ८५ लाख रुपैयाँ निष्काशन गर्ने अनुमति प्रदान गरेको हो ।

कम्पनीले यस अगाडि प्रभावित क्षेत्रका लागि ९ लाख ९० हजार कित्ता आइपिओ निष्काशन गरिसकेको छ । प्रभावित क्षेत्रमा पुर्ण रुपमा बिक्री भैसकेपछि दोस्रो चरणमा सर्वसाधारणको लागि निष्काशन गर्ने भएको हो । कम्पनीको प्राथमिक शेयर निष्काशन तथा विक्री प्रवन्धकमा नबिल इन्भेष्टमेन्ट बैंकिङ रहेको छ । क्रेडिट रेटिङ नेपालले गरेको रेटिङ अनुसार ’इक्रा एनपि आइपिओ ग्रेड ४’ प्राप्त गरेको छ । यसले कम्पनीको औषत वित्तीय अवस्था रहेको जनाउँछ ।

कम्पनीले रामेछाप र दोलखा जिल्लाको सीमामा बग्ने खिम्ति खोलामा दुई वटा आयोजना निर्माण गरिरहेको छ । उपल्लो खिम्ति आयोजनाको जम्मा लागत एक अर्ब ९१ करोड रुपैयाँ र अपर खिम्ति आयोजनाको जम्मा लागत एक अर्ब २३ करोड रुपैयाँ लाग्ने अनुमान गरिएको छ । हालसम्म उक्त आयोजनाहरुको काम ५५ प्रतिशत सकिएको कम्पनीले जनाएको छ । कम्पनीले आयोजना निर्माणको लागि ९९ करोड रुपैयाँ शेयर पूँजीबाट जुटाउने भएको छ । जसमा संस्थापक शेयरधनीको ७५ प्रतिशत अर्थात ७४ करोड २५ लाख रुपैयाँ, आयोजना प्रभावित क्षेत्रको लागि १० प्रतिशत अर्थात ९ करोड ९० लाख रुपैयाँ र सर्वसाधारण शेयरधनीको लागि १५ प्रतिशत अर्थात १४ करोड ८५ लाख रुपैयाँ रहेको छ । संस्थापक तर्फको शेयर पूँजी जुटिसकेको छ भने बाँकी जुटाउने तयारीमा छ ।