६ माघ/अर्थ र व्यापार– उच्च उचाईका लागि उडान भर्ने योजनाअनुरुप परीक्षण उडानका लागि हिमालय एयरलाइन्सको एच ९–९६१ विमान ल्हासा प्रस्थान गरेको छ ।
एच ९–९६१ कलसाइनको विमान मंगलबार बिहान ७ः१७ बजे त्रिभुवन अन्तर्राष्ट्रिय विमानस्थलबाट उडेर ल्हासाको गोंगर अन्तर्राष्ट्रिय विमानस्थलमा स्थानीय समय बिहान १०ः४६ बजे अवतरण गरेको हिमालय एयरलाइन्सले जनाएको छ ।
क्याप्टेन हाओ दीलेको नेतृत्वमा अरु वरिष्ठ क्याप्टेनहरुसहित ल्हासाबाट आजै पुनः फिर्ती उडान गर्ने गरी परीक्षण उडान भइरहेको कम्पनीले जनाएको छ ।
परीक्षण उडानका लागि एयरलाइन्सले सन् २०२० को मार्च महिनामै विशेषतः उच्च उचाईका लागि उडान भर्न एच९–एजेके नाममा दर्ता भएको न्यारोबडी हवाई जहाज ए३१९–११५ प्रयोगमा ल्याएको थियो ।
१२० इकोनोमी र ०८ बिजनेस क्लास सिटको व्यवस्था भएको एयरक्राफ्ट उच्च उचाइको उडान भर्नको लागि परिमार्जित गरेको कम्पनीले जनाएको छ ।
विमानले अधिकतम १४ हजार ५०० फिटसम्मको एरोड्रम उचाइको ट्रान्स हिमालयन मार्गहरू सञ्चालन गर्ने क्षमता रहेको बताइएको छ ।
हिमालय एयरलाइन्सका अध्यक्ष झोउ एन्योङ्गले हिमालय टोली गत वर्षदेखि नै ल्हासा जस्तो उच्च उचाइको गन्तव्यको उडानका लागि सावधानीपूर्वक कार्यरत रहेको बताएका छन् ।
अध्यक्ष झोउ एन्योङ्गले आजको सफल परीक्षण उडानले सुरक्षा, टिम भावना र विजयी भावनाको हाम्रो प्रमुख मार्ग निर्देशक सिद्धान्तहरुको प्रतिबद्धतालाई प्रबल बनाएको बताए ।
परीक्षण उडान सन् २०२१ को ग्रीष्म ऋतुमा ल्हासामा तालिकाबद्ध उडानहरू सुरू गर्ने व्यवसायिक योजना अनुरुप नै भएको कम्पनीले जनाएको छ ।
तपाईको प्रतिक्रिया