६ जेठ /अर्थ र व्यापार-  हिमाल दोलखा हाइड्रोपावर कम्पनीले जेठ १४ गतेदेखि प्राथमिक शेयर ‘आइपिओ’ निष्काशन गर्ने भएको छ ।  प्रभावित क्षेत्रका बासिन्दाको लागि कम्पनीले १६ लाख कित्ता प्राथमिक शेयर निष्काशन गर्ने लागेको हो । कम्पनीले इलाम जिल्लामा ४.५ मेगावाट क्षमताको माईखोला साना जलविद्युत आयोजना र ८ मेगावाट क्षमताको माई साना क्यासेड जलविद्युत आयोजना निर्माण गरेको छ । दुबै आयोजनाले व्यावसायिक उत्पादन सुरु गरिसकेका छन् । 

माई खोलाको कुल लागत ७२ करोड ५१ लाख रुपैयाँ रहेको छ भने प्रतिमेगावाट लागि १६ करोड ११ लाख रुपैयाँ छ । त्यस्तै माई सानो क्यासेडको कुला लागत एक अर्ब ४२ करोड रुपैयाँ छ भने प्रतिमेगावाट लागत १७ करोड ८० लाख रुपैयाँ लागेको कम्पनीले जनाएको छ । कम्पनीको जारी पूँजी एक अर्ब ६० करोड रुपैयाँ रहेको छ। जारी पूँजीको ५१.२५ प्रतिशत अर्थात ८२ करोड रुपैयाँ उठाइसकेको छ । सर्वसाधराण समुह तर्फको १० प्रतिशत अर्थात १६ करोड रुपैयाँ प्रभावित क्षेत्रका बासिन्दाबाट उठाउने छ भने बाँकी ३८.७५ प्रतिशत अर्थात ६२ करोड रुपैयाँ सर्वसाधारणबाट उठाउने योजना बनाएको छ । 

दुई आयोजनाको जम्मा लागत दुई अर्ब १४ करोड रुपैयाँ छ । जसमा शेयर पूँजीबाट एक अर्ब ६० करोड रुपैयाँ जुटाउनेछ । आयोजनाको जम्मा लागतको ७४.४२ प्रतिशत शेयर पूँजीबाट जुटाउदा भोलिका दिनमा कम्पनीको प्रतिशेयर आम्दानी १० रुपैयाँ भन्दा तल रहने देखिन्छ ।कम्पनीको साधारण लगानी फिर्ता अवधि ७ वर्षको रहेको छ । 

आयोजना प्रभावित क्षेत्रका बासिन्दाले इलाम जिल्लामा रहेका ७ वटा बैंक, आयोजनाको निर्माण स्थलका साथै नेपाल धितोपत्र बोर्डबाट आस्वा सुविधा प्राप्त सम्पुर्ण बैंक तथा वित्तीय संस्थाहरुबाट पाइनेछ । प्रभावितले जेठ २८ गतेसम्म निष्काशन गर्नेछ । यदि पहिलो चरणमा बिक्री नभएमा ढिलोमा असार १३ गतेसम्म निष्काशन हुने धितोपत्र निष्काशन तथा बिक्री प्रवन्धक ग्लोबल आइएमइ क्यापिटलले जनाएको छ । प्रभावित क्षेत्रका बासिन्दाको लागि शेयर निष्काशन गरे पछि सर्वसाधारणको लागि बिक्री खुला गर्ने कम्पनीले जनाएको छ ।