४ पुष / अर्थ र व्यापार - जनकपुर। शीतलहर र कुहिरोको कारण आवश्यक भिजिविलिटी नपुगेर अवरुद्ध भएको जनकपुरको विमान सेवा पाँच दिनपछि मंगलबारदेखि सुचारु भएको छ ।

गत मंसिर २९ गतेबाट जनकपुर–काठमाडौं विमानसेवा ठप्प भएको थियो । काठमाडौं–जनकपुर–काठमाडौं रुटमा बुद्ध एयरको दुई र यति एयरको एक गरी दैनिक तीन उडान हुँदै आएको छ । यो अवधीमा विमान सेवा ठप्प हुँदा जनकपुर–काठमाडौं ओहोरदोहोर गर्ने दैनिक कम्तीमा तीन सय यात्रुले समस्या झेल्नुपरेको थियो ।

विमान अवतरण तथा उडान गर्न विमानस्थल क्षेत्रमा कम्तीमा दुई हजार भिपिआर भिजिविलिटी आवश्यक पर्छ । मंसिर २९ गतेदेखि मंगलबार दिउँसोसम्म सात सय भिपिआर भन्दा पनि तल भिजिविलिटी पुगेकोले विमान सेवा अवरुद्ध भएको जनकपुर विमानस्थल कार्यालयले जनाएको छ । मंगलबार दिउँसो कुहिरो हटेर घाम लाग्ने वितिकै पुर्ववत अवस्थामा विमान सेवा सुचारु भएको छ ।

यता लगातार पाँच दिनसम्म चलेको शीतलहरको कारण कष्टकर बनेको मध्यपूर्वी तराईको जनजीवन पनि समान्य भएको छ । गर्मी मौसममा अति गर्मी र जाडोमा शीतलहरको चपेटमा पर्ने यस क्षेत्रमा हरेक वर्ष पुस र माघ महिना कष्टकर हुने गरेको छ । निरन्तरको शीतलहरले आलु, टमाटर र लहरोजन्य तरकारीबालीमा समेत ठूलो क्षति हुने गरेको छ ।