६ मंसिर / अर्थ र व्यापार - काठमाण्डौ । मंसिर १ गतेदेखि सुरु भएको १५ औं हस्तकला व्यापार मेला मंगलबार सकिएको छ । मेलामा ८ करोड ५० हजार रुपैयाँ बराबरको कारोबार भएको नेपाल हस्तकला व्यापार मेला समितिका संयोजक हेमरत्न शाक्यले जानकारी दिनुभयो । मंगलबार सम्पन्न १५ औं हस्तकला ब्यापार मेलामा लक्ष्यभन्दा १ करोड ५० लाख कम कारोबार भएको छ । यसअघिको मेलामा १० करोडभन्दा बढी कारोबार हुने अनुमान गरिएको थियो । नेपाल हस्तकला महासंघको आयोजनामा गत मंसिर १ गतेदेखि मेला सुरु भएको थियो । मेलामा ३ करोड भन्दा बढीको सामान बुकिङ भएको छ भने १ लाख ८ हजार जनाले अवलोकन गरेका छन् ।

गत आर्थिक वर्षमा हस्तकला निकासी करीब ५ अर्ब बराबरको रहेको थियो । चालू आर्थिक वर्षको प्रथम चौमासिकमा तथ्यांकले यस वर्ष हस्तकलाका वस्तुहरुको निर्यात वृद्धि हुने संकेत देखाएको छ । मेलामा २५ जिल्लाका स्थानिय हस्तकला बस्तुहरुको प्रतिनिधित्व रहेको र नेपाल सरकार बाणिज्य मन्त्रालयको नेपाल ब्यापार एकिकृत रणनितिभित्र परेका वस्तुहरुलाई पनि मेलामा उच्च प्राथमिकतामा राखिएको थियो । मेलामा उत्कृष्ट प्याभिलियनतर्फ फेयर ट्रेड ग्रुप नेपाललाई एकलाख रुपैयाँ बराबरको पूरस्कार प्रदान गरिएको थियो । त्यस्तै उत्कृष्ट स्टलमा फिंगर प्रिन्ट आर्ट एण्ड क्राफ्ट्सलाई दिइएको थियो ।