१४ जेठ /अर्थ र व्यापार - एभरेष्ट इस्योरेन्स कम्पनीले आजदेखि हकप्रद शेयर निष्काशन गरेको छ । कम्पनीले वैशाख ८ गतेसम्म कामय शेयरधनीहरुका लागि चुक्ता पूँजीको ३०० प्रतिशत एक कित्ता बराबर तीन कित्ताको अनुपातमा हकप्रद शेयर निष्काशन गरेको हो । 

कम्पनीले असार १६ गतेसम्म हकप्रद शेयर निष्काशन तथा बिक्री खुला गर्ने धितोपत्र निष्काश तथा बिक्री प्रवन्धक सिद्धार्थ क्यापिटलले जनाएको छ । 
प्रति कित्ता १०० रुपैयाँको दरमा ८२ लाख १९ हजार ४७५ कित्ता हकप्रद शेयर निष्काशन गरे सँगै चुक्ता पूँजी एक अर्ब ९ करोड रुपैयाँ पुग्नेछ । 
कम्पनीले यस अगाडि चुक्ता पूँजीको १०५ प्रतिशत संस्थापक हकप्रद शेयर निष्काशन गरेर संस्थापक तर्फ ५१.२२ प्रतिशत र सर्वसाधारण तर्फ ४८.७८ प्रतिशतको शेयर संरचना बनाएको थियो । बीमा समितिले निर्जीवन बीमा कम्पनीहरुको लागि एक अर्ब रुपैयाँ पूँजी पुर्याउन निर्देशन दिए सँगै कम्पनीले ६०० प्रतिशत हकप्रद शेयर निष्काशनको घोषणा गरेको थियो ।

नेपाल धितोपत्र बोर्डले कम्पनी ऐन र बीमा ऐन अनुसार संस्थापक र सर्वसाधारण शेयर धनीको संचरना नभएको भन्दै हकप्रद शेयर निष्काशनका लागि रोक लगाएको थियो । बोर्डले निर्देशन बमोजिम कम्पनीले हकप्रद मार्फत संस्थापक शेयरधनी कायम गरेको हो । संस्थाको हालको चुक्ता पूँजी २७ करोड ३९ लाख रुपैयाँ छ । हकप्रद निष्काशन सँगै बीमा समितिले निर्देशन गरेको न्युनतम चुक्ता पूँजी जुटाउने छ । हकप्रद शेयर निष्काशनका लागि गरेको क्रेडिट रेटिङमा कम्पनीले औषत भन्दा तलको प्रतिफल दिने सूचक ‘केयर एनपि आइपिओ ग्रेड चार’ प्राप्त गरेको छ । 

हकप्रद शेयरका लागि एभरेष्ट इन्स्योरेन्स कम्पनीका सम्पुर्ण शाखा कार्यालयहरु, सिद्धार्थ क्यापिटल नक्सान र नेपाल धितोपत्र बोर्डबाट आस्वा सुविधाको लागि अनुमति प्राप्त सम्पुर्ण बैंक तथा वित्तीय संस्थाहरुबाट पाइने छ ।