१७ असार/अर्थ र व्यापार– कोभिड महामारी नियन्त्रणका लागि सरकारले विगत २ महिना देखि स्थगन गरेको आन्तरिक उडान बिहीवारदेखि शुरु भएको छ ।

सरकारले गत वैशाख २० गतेदेखि आन्तरिक तथा वैशाख २३ गतेदेखि अन्तरराष्ट्रिय उडान स्थगन गरेको थियो । 
संस्कृति, पर्यटन तथा नागरिक उड्डयन मन्त्रालयले आज बिहीवारदेखि आन्तरिक उडान नियमित रुपमा शुरु गर्न हवाई कम्पनीहरुलाई अनुमति दिए पनि हाललाई साविकको तुलनामा ५० प्रतिशत उडानमात्रै हुने मन्त्रालयले बताएको छ । 

नेपाल नागरिक उड्डयन प्राधिकरणले दैनिक ६४ ओटा उडानमात्रै गर्ने गरी तयारी गरेको छ । जसअनुसार बुद्ध एयरले दैनिक ३१, यति एयरलाइन्सले १५, श्री एयरलाइन्सले ७ र सौर्य एयरलाइन्सले तीन ओटा उडान गर्न अनुमति पाएको छ । दुर्गम क्षेत्रमा उडाउने कम्पनीले काठमाडौंबाट दैनिक आठ ओटा उडानको अनुमति पाएका छन् । 

यात्रुले तोकिएको स्वास्थ्य मापदण्ड अनिवार्य रुपमा पालना गर्नुपर्ने बताएको छ भने कोरोनाका लक्षण देखिएका यात्रुले जहाजमा यात्रा गर्न पाउने छैनन् ।