३० बैशाख /अर्थ र व्यापार - अरुण भ्याली हाइड्रोपावरले ४ करोड १७ लाख रुपैयाँ नाफा आर्जन गरेको छ । यो गत वर्षको चालु आर्थिक वर्षको तेस्रो त्रैमास अवधिको तुलनामा ७४.५१ प्रतिशतले बढि हो । गत वर्ष हाइड्रोपावरले २ करोड ३९ लाख रुपैयाँ नाफा कमाएको थियो ।

विद्युत विक्री र अन्य स्रोत मार्फतको आम्दानी बढेसँगै हाइड्रोपावरको नाफा बढेको हो । योसँगै हाइड्रोपावरले प्रशासनिक खर्च र आयोजना खर्च पनि सीमित बनाएको छ । यस अवधिमा हाइड्रोपावरको प्रतिशेयर आम्दानीमा भने २ रुपैयाँ ५५ पैसाको बढेको छ । गत वर्ष ३ रुपैयाँ ४२ पैसा रहेको हाइड्रोपावरको प्रतिशेयर आम्दानी चालु आर्थिक वर्षको तेस्रो त्रैमासमा ५ रुपैयाँ ९७ पैसा रहेको छ ।

यस अवधिमा हाइड्रोपावरले विद्युत विक्री मार्फत् ४ करोड २० लाख रुपैयाँ आम्दानी गरेको छ । यो गत वर्षको यसै अवधिको तुलनामा १८.२३ प्रतिशतले धेरै हो । गत वर्ष हाइड्रोपावरले विद्युत विक्री मार्फत् ३ करोड ५५ लाख रुपैयाँ आम्दानी गरेको थियो ।

यसैगरी हाइड्रोपावरले अन्य स्रोत मार्फतको आम्दानी १५२.०४ प्रतिशतले बढाएको छ । गत वर्षको यसै अवधिमा अन्य स्रोत मार्फत् एक करोड २० लाख रुपैयाँ आम्दानी गरेको हाइड्रोपावरले चालु आर्थिक वर्षको तेस्रो त्रैमासमा ३ करोड ४ लाख रुपैयाँ आम्दानी गरेको छ ।

हाइड्रोपावरले प्रशासनिक खर्च ६१.०९ ले घटाएर २६ लाख ८१ हजारमा झारेको छ भने आयोजना खर्च ४४.११ प्रतिशतले घटाएर ३६ लाख ६३ हजार रुपैयामा सीमित बनाएको छ । ९३ करोड ३० लाख रुपैयाँ बराबरको चुक्ता पूँजी स्थिर राखेको हाइड्रोपावरले जगेडा कोषमा १३५.९७ प्रतिशतले सुधार गर्दै ६ करोड ६३ लाख रुपैयाँ सञ्चित गरेको छ । गत वर्ष हाइड्रोपावरको जगेडा कोषमा २ करोड ८० लाख रुपैयाँ सञ्चित थियो ।हाइड्रोपावरको प्रतिशेयर नेटवर्थ १०७ रुपैयाँ ११ पैसा र मूल्य आम्दानी अनुपात १७.१० गुणा बढी छ ।