२८ माघ/ अर्थ र व्यापार  - अरुण काबेली पावर कम्पनीको चालु आर्थिक वर्षको दोस्रो त्रैमासमा ६ लाख २६ हजार रूपैयाँ नाफा पुगेको छ । कम्पनीको मुख्य आयस्रोत विद्युत बिक्रीको आम्दानी नहुँदा नै कम्पनी नाफामा पुगेको हो । कम्पनीले अन्य स्रोत मार्फत भएको १७ लाख ३५ हजार रूपैयाँ आम्दानीले कार्यालय सञ्चालन खर्च र ह्रासकट्टी (डिप्रिसिएसन) खर्च घटाएर पनि कम्पनीले नाफा आर्जन गरेको छ । गत आर्थिक वर्षको यसै अवधिमा कम्पनीले १६ लाख ६० हजार खुद नोक्सानी बेहोरेको थियो । 

एक अर्ब ५० करोड चुक्ता पूँजी रहेको कम्पनीको जगेडा कोषको आकार एक करोड ४९ लाख रुपैयाँले ऋणात्मकमा झरेको छ । गत वर्षको यसै अवधिमा कम्पनीको जगेडा कोष एक करोड ५५ लाख रुपैयाँले ऋणात्मक रहेको थियो । गत वर्ष २७ लाख सञ्चालन नोक्सानीमा रहेको कम्पनी चालु आर्थिक वर्षको दोस्रो त्रैमासमा १३ लाख ८ हजार सञ्चालन नाफामा रहेको छ । समीक्षा अवधिमा ८ पैसा प्रतिशेयर आम्दानी गरेको कम्पनीको प्रतिशेयर नेटवर्थ ९९ रुपैयाँ १ पैसा छ ।

यस परियोजनाको कार्य अन्तिम चरणमा पुगेको र फागुन महिनाभित्रै आयोजनाको निर्माण सम्पन्न भई चालु हुने बताइएको छ । कम्पनीले काबेली १ बाट उत्पादन हुने २५ मेगावाट विद्युत थालेपछि मात्र कम्पनीको सूचाङ्कहरु थप सुधार हुँदै जानेछन् ।