३० साउन/अर्थ र व्यापार– आइएमई र जीएमई रेमिटबीच मर्जर भएको छ। मर्जरपछि एकीकृत कारोबार बुधबार एक कार्यक्रमबीच सुरु भएको छ । मर्जरपछि आइएमई लिमिटेडको नामबाट एकीकृत कारोबार थालिएको हो । मर्जरपछि कम्पनीको चुक्ता पुँजी १ अर्ब १५ करोड रुपैयाँ पुगेको सो कम्पनीले जनाएको छ।
कार्यक्रममा आइएमई ग्रुपका अध्यक्ष चन्द्रप्रसाद ढकालले आइएमईलाई छिटै पब्लिक कम्पनीमा लैजान लागेको बताए। ग्रुपमार्फत सरकार र जनताको आवश्यकता र प्राथमिकतामा रहेका विभिन्न डेढ दर्जन बढी क्षेत्रमा लगानी विस्तार गरेको अध्यक्ष ढकालले बताए ।
उनले रेमिट्यान्स सेवाबाट व्यावसायिक यात्रा सुरु गरेको आइएमईले अहिले आफ्नो लगानी सेवामूलक, उत्पादनमूलक र पूर्वाधार विकासका विभिन्न क्षेत्रमा विस्तार गरिरहेको बताए ।
‘आइएमई सुरुवातको समय करिब २० प्रतिशत मात्र औपचारिक रहेको रेमिट्यान्स अहिले करिब ८० प्रतिशत औपचारिक माध्यमबाट आउन थालेको नेपाल राष्ट्र बैंकको पछिल्लो तथ्यांकले देखाएको छ । यसमा नेपालको पहिलो रेमिट्यान्स कम्पनीको रुपमा आइएमईको योगदान अवश्य धेरै नै छ,’ उनले भने।
अध्यक्ष ढकालले नेपालमा आउने रेमिट्यान्सको करिब ५० प्रतिशत बजार हिस्सा पनि बैंक तथा वित्तीय संस्थाको रहेको बताए।