२७ साउन/अर्थ र व्यापार – सन नेपाल लाइफ इन्स्योरेन्सको खुद नाफा घटेको छ। कम्पनीले आर्थिक वर्ष २०८०/८१ मा ५७ करोड ४९ लाख रुपैयाँ खुद नाफा कमाएको छ।
कम्पनीले आर्जन गरेको सो नाफा अघिल्लो वर्षको तुलनामा २६.५२ प्रतिशतले कम हो। कम्पनीले आव २०७९/८० मा ७८ करोड २५ लाख रुपैयाँ खुद नाफा आर्जन गरेको थियो।
यस कम्पनीको दाबी भुक्तानी वृद्धि हुँदा खुद नाफामा घटेको हो। अघिल्लो वर्ष कम्पनीको दाबी भुक्तानी १०.५९ प्रतिशतले वृद्धि भएको छ । कम्पनीले गत वर्ष २ अर्ब ८४ करोड ६९ लाख रुपैयाँ दाबी भुक्तानी गरेको छ।
कम्पनीको खुद प्रिमियम संकलन १५.७८ प्रतिशतले वृद्धि भएको छ । अघिल्लो वर्षमा २ अर्ब ९८ करोड रुपैयाँ खुद प्रिमियम संकलन गरेकामा गत आव ३ अर्ब ४५ करोड रुपैयाँ आर्जन गरेको छ । कम्पनीको प्रति सेयर आम्दानी १४.५१ रुपैयाँमा सीमित भएको छ ।
अघिल्लो वर्ष सन नेपालको प्रति सेयर आम्दानी ३४.९४ रुपैयाँ थियो। प्रतिसेयर नेटवर्थ १५७.८७ रुपैयाँ छ । असार मसान्तसम्म कम्पनीको चुक्ता पुँजी ३ अर्ब ९६ करोड १६ लाख रुपैयाँ रहेको छ।