२० फागुन/अर्थ र व्यापार – प्रभु महालक्ष्मी लाइफ इन्स्योरेन्स लिमिटेडको प्रमुख कार्यकारी अधिकृत (सिईओ)मा सन्तोष प्रसाई नियुक्त भएका छन् । प्रभु महालक्ष्मी लाइफ इन्स्योरेन्स लिमिटेडको शुक्रबार बसेको सञ्चालक समितिको बैठकले प्रसाईलाई आगामी चारवर्षे कार्यकालकालागि प्रमुख कार्यकारी अधिकृतमा नियुक्त गर्ने निर्णय गरेको हो ।

बीमा क्षेत्रको नियमनकारी निकाय नेपाल बीमा प्राधिकरण (साविक बीमा समिति) बाट बीमा क्षेत्रमा प्रवेश गरेका प्रसाई बीमा क्षेत्रमा अनुभवी व्यक्तिको रुपमा परिचित छन् । प्रसाईसँग नेपाल लाइफ इन्स्योरेन्स र साविक प्रभु लाइफ इन्स्योरेन्समा प्रमुख कार्यकारी अधिकृतको जिम्मेवारी सम्हालेको अनुभव छ ।यसअघि प्रसाई साविकको प्रभु लाइफ इन्स्योरेन्स लिमिटेड र साविकको महालक्ष्मी लाइफ इन्स्योरेन्स लिमिटेड बीच मर्जर पछि बनेको प्रभु महालक्ष्मी लाइफ इन्स्योरेन्समा वरिष्ठ नायब प्रमुख कार्यकारी अधिकृतको भूमिकामा थिए ।

प्रभु महालक्ष्मी लाइफ इन्स्योरेन्सको नवनियुक्त सिईओ प्रसाई चार्टर्ड एकाउन्टेन्ट समेत हुन् । नवनियुक्त सिईओ प्रसाईको अग्रतामा यस कम्पनीले नयाँ उचाई लिनेमा सञ्चालक समिति तथा सम्पूर्ण कर्मचारीहरुले विश्वास लिएको सो कम्पनीले जनाएको छ ।