५ वैशाख/अर्थ र व्यापार – अजोड र युनाइटेड इन्स्योरेन्सको एकीकृत कारोबार जेठ पहिलो साताबाट सुरु हुने भएको छ । एकीकृत कारोबार थाल्ने मिति तय गर्न दुवै कम्पनीका सञ्चालकहरुबीच छलफल भएको छ ।
अजोड इन्स्योरेन्सका प्रमुख कार्यकारी अधिकृत कुमार खत्रीले मिति टुंगो गर्न छलफल भएको जानकारी दिए । विशेष साधारणसभा आगामी २५ वैशाखमा गरिने भएको छ । उनले सभा गरेपछि एकीकृत कारोबार थाल्ने मिति टुंगो हुने बताए ।

मर्जरका लागि दुवै कम्पनीको एक्चुअरी भ्यालुएसन र डीडीए लगायतका सबै काम भइसकेको बताउँदै उनले भने, ‘अब कम्पनी रजिष्ट्रार, धितोपत्र बोर्डहरुमा काम बाँकी रहेकाले एकीकृत कारोबारका लागि मिति केही पछाडि सारिएको हो । ’
मर्जरपछि अजोड युनाइटेड कम्पनीको नामबाट एकीकृत कारोबार गरिने भएको छ । नयाँ कम्पनीमा अध्यक्ष अजोड इन्स्योरेन्सका आजाद श्रेष्ठ रहने छन् भने प्रमुख कार्यकारी अधिकृतमा युनाइटेड इन्स्योरेन्सबाट हुने समझदारी छ ।

यी दुई कम्पनी स्वाप रेसियो १ बराबर ८२.५ को अनुपातमा मर्ज भएका हुन् । नयाँ बन्ने कम्पनीको चुक्ता पुँजी १ अर्ब ९० करोड पुग्नेछ । नेपाल बीमा प्राधिकरणले निर्जीवन बीमा कम्पनीलाई चुक्ता पुँजी २ अर्ब ५० करोड रुपैयाँ पु¥याउन निर्देशन दिएको थियो।
मर्जरपछि पनि यी दुई कम्पनीको चुक्ता पुँजी भने प्राधिकरणले तोकेको भन्दा करिब ६० करोड कम हुनेछ । गत २७ पुसमा यी दुई कम्पहनीले मर्जरको लागि प्रारम्भिक सम्झौता पत्र र गत १६ चैतमा अन्तिम सम्झौता पत्रमा हस्ताक्षर गरेका हुन् ।

यस अघि अजोडले प्रभु इन्स्योरेन्सगँ मर्जरको लागि प्रारम्भिक सम्झौता पत्रमा हस्ताक्षर गरेको थियो। तर एकिकृत कारोबार गर्ने तयारी गरिरहेको यी दुई कम्पनीको अन्तिम चरणमा मर्जर तोडिएको थियो। त्यसलगतै अजोडले चुक्ता पुँजी वृद्धि गर्न युनाइटेड सगँ मर्जर प्रक्रिया अघि बढाएको हो।