९ चैत/अर्थ र व्यापार – आईएमई र मिदास एजुकेसनसँगको सहकार्यमा र्ई‐लर्निङ प्रवद्र्धन अभियान सुरु भएको छ । मंगलबारदेखि सुरु भएको यस अभियान आगामी ३१ वैशाखसम्म जम्मा ५४ दिनका लागि लागू हने सो कम्पनीले जनाएको छ ।
यो अभियानमा, नेपालमा सफलतापूर्वक विदेशबाट आईएमई मार्फत रकम पठाउँदा भुक्तानी गरिसकेपछि आईएमईका अन्तर्राष्ट्रिय साझेदारहरूबाट डाउनलोड लिंकसहितको एसएमएस र लाभार्थीलाई प्रोमो कोड पठाइनेछ । लाभार्थीले आफ्नो मोबाइलमा प्राप्त लिंकमा क्लिक गरी मिदास ई–क्लास सरलीकरण शिक्षा एप इन्स्टल गर्न सक्नेछन् ।
एप डाउनलोडपछि, प्रापकले निःशुल्क ई–लर्निङ प्राप्त गर्न प्रोमो कोड प्रयोग गर्न सक्छन् र सोही कोड प्रयोग गरी कक्षा नर्सरीदेखि कक्षा १० सम्मका विद्यार्थीहरुले निःशुल्क पढ्न पाउनेछन् । सरकारी तथा निजी विद्यालयमा पढ्ने सबै बालबालिकाले शिक्षक/शिक्षिका र अभिभावकको रेखदेखमा मात्रै पढाइलाई अघि बढाइरहेका हुन्छन् ।
तर ई‐क्लासले पाठ अनुसारका गेम, भिडियो, चित्र र चित्रअनुसारको आवाज, एनिमेनसन र इलुस्ट्रेसनले बालबालिकाको ध्यान पढ्नमा आकर्षित गर्छ । अडियो र भिडियो माध्यम पाठ्यसामग्रीमा प्रयोग गर्दा विद्यार्थीलाई रमाइलो पनि हुन्छ ।
मिदास ई–क्लासमा बालबालिका सिक्नका लागि थप उत्सुक हुनुका साथै स्वअध्ययन गर्ने बानीको पनि विकास हुँदै जान्छ भन्ने विश्वासका साथ यो अभियान सुरु गरिएको सो कम्पनीले जनाएको छ ।