३१ साउन/अर्थ र व्यापार – बजारमा असुरक्षित ग्यास सिलिण्डर पठाउने उद्योगलाई नेपाल गुणस्तर तथा नापतौल विभागले ग्यास भर्न रोक लगाएको छ । विभागले आफ्नो अनुगमनका क्रममा सिलिण्डरमा कैफियत देखिएपछि सगरमाथा ग्यास उद्योगलाई ग्यास भर्न रोक लगाएको हो।
बजारमा असुरक्षित सिलिण्डरमा ग्यास बिक्री गरेको पाइएपछि नेपाल आयल निगम र विभागको टोलीले सयुंक्तरुपमा उद्योगको अनुगमन गरेको थियो।
विभागका प्रवक्ता प्रभातकुमार सिंहले अनुगमन गर्दा कम्पनीमा धेरै कैफियत देखिएकाले ग्यास भर्न रोक लगाउने निर्णय गरेको बताए । ‘हामीले अनुगमन गर्दा धेरै कैफियत देखियो,’ उनले भने, ‘त्यहीकारण अहिले कम्पनीलाई ग्यास फिलिङ गर्न रोक लगाउने निर्णय भएको छ । बिहीबार बिहानसम्म हाम्रो परिपत्र जान्छ। त्यसपछि उद्योगले ग्यास भर्न पाउने छैन।’
विभागले सो उद्योगसँग स्पष्टीकरण पनि मागेको उनले जानकारी दिए । ‘ग्यास भर्न नदिने निर्णय हामीले अर्को अनुगमन नगरेसम्म लागू हुनेछ। उद्योगको स्पष्टीकरणपछि हामी फेरि अनुगमनमा जान्छौं। त्यतिखेर उद्योगले के कस्तो सुधार गर्छ ? त्यस आधारमा अर्को निर्णय हुनेछ,’ उनले भने।
गुणस्तर विभागले निगमलाई पठाएको पत्रअनुसार यही २७ साउनमा सो उद्योगमा निरिक्षण गर्दा नेपाल गुणस्तर ५३३ बमोजिम विभिन्न कैफियतहरु देखिएको थियो । विभागको बुधबार बसेको बैठकले उद्योगलाई मापदण्ड विपरित एलपी ग्यास भरिएका सिलिन्डरहरु बजारबाट फिर्ता लिन निर्देशन दिएको छ । यस्तै ग्यास फिलिङमा पनि बन्द गर्न निर्देशन दिने गरि विभागले निर्णय गरेको छ।
यसैगरी, आकास्मिक निरिक्षणको क्रममा उठाइएका कैफियतहरु के कति कारणले भएको हो र नेपाल गुणस्तर प्रमाण चिह्न ऐन २०३७ तथा नियमावली २०४० बमोजिम कारवाही किन नहुनु पर्ने हो कुनै कारण भए सफाईको सबुत प्रमाणसहित १५ दिनभित्र स्पष्टीकरण पेश गर्न निर्देशन दिइएको छ।
विभागले दिएको निर्देशन अनुसार उद्योगको इजाजतपत्र नै रद्द हुन सक्छ । नेपाल गुणस्तर ऐन २०३७ तथा नियमावली २०४० बमोजिम यस्तो गुणस्तर नभएको काम गरेको प्रमाणित भएमा उद्योगको इजाजतपत्र वा प्रमाणपत्र रद्द स्थगित हुनेछ । एनएस इजाजतपत्र प्राप्त भएको उद्योगहरुले उत्पादित निर्मित वा आङ्गिकृत प्रक्रिया वा प्रदत्त सेवा नेपाल गुणस्तर अनुरुप नभएमा विभागले ऐन अनुसार उद्योगको इजाजतपत्र रद्द गर्न सक्ने प्रावधान छ।
यस्तै इजाजतपत्र रद्द गर्नु अगावै त्यस्ता उद्योगलाई १५ दिनको समय दिएर स्पष्टीकरण माग गर्नुपर्नेछ। अहिले विभागले सोही प्रावधान बमोजिम उद्योगसँग स्पष्टीकरण माग गरेको हो । १५ दिनभित्र स्पष्टीकरण पेश गरेमा त्यसबारे छलफल गरि विभागले इजाजतपत्र रद्द गर्ने नगर्ने अन्तिम निर्णय गर्नेछ।
असुरक्षित सिलिण्डरमा ग्यास बिक्री गरेर उपभोक्ताको सुरक्षामाथि खेलवाड गरेको पाइएपछि निगमले गत आइतबारदेखि उद्योगलाई प्रोडक्ट डेलिभरी अर्डर(पीडीओ) रोक्का गरिसकेको छ।
निगमले ग्यास बोटलिङ प्लान्टमा ४ वर्षदेखि अनुगमन नगर्दा व्यवसायीले बजारमा असुरक्षित सिलिण्डरमा ग्यास बिक्री गर्ने प्रवृत्ति मौलाएको छ । आफ्नो कमजोरी बाहरिएपछि निगमले सबै ग्यास बोटलिङ प्लान्टको अनुगमन गर्ने निर्णय गरेको छ ।