१६ असोज/अर्थ र व्यापार– कोभिड–१९ संक्रमणबीच ६ महिनाको अवधिमा पाँच वटा ग्यास उद्योग बिक्री भएको छ।

६ महिनाको अवधिमा आरती, एचपी, त्रिवेणी, गीता र सैपाल ग्यास उद्योग बिक्री भएको हो ।

खेतान समूहको एचपी ग्यास बाहेक सबै ग्यास उद्योग कोभिड–१९ संक्रमणका कारण गरिएको लकडाउनले आर्थिक क्षति हुदा बिक्री भएको देखिन्छ।  

यसैबीच नवलपरासीमा रहेको आरती ग्यास उद्योग बिक्री भएको छ । कोभिड–१९ संक्रमणबीच बिक्री हुनेमा आरती पाँचौ उद्योग हो । आरती ग्यास उद्योग दिवान चन्दले १५ करोड रुपैयाँमा किनेका हुन् । उनी नेपाल एलपी ग्यास उद्योग संघका महासचिव पनि हुन् ।

कोभिड–१९ संक्रमण नियन्त्रणको लागि गरेको लकडाउनका कारण होटल, रेष्टुरेन्टहरु बन्द हुंदा ग्यासको खपतमा ३० प्रतिशतले कमि आएको थियो । 

बजारमा ग्यास खपतमा कमी आएपछि केही टन मात्रै ग्यास बिक्री गर्ने उद्योगहरु सबैभन्दा बढी नोक्सानीमा गए ।एक ग्यास उद्योग संञ्चालकका अनुसार कोभिड–१९ संक्रमणका कारण ग्यासको खपतमा कमि आएसंगै आफुले बिक्री प्रक्रिया अगाडी बढाएको बताए ।  

ग्यासमा वर्षौदेखि लगानी गरेका स्थापित उद्योगीहरुले खर्च पनि धान्नै नसक्ने अवस्थामा पुगेका उद्योगहरुलाई सस्तोमा खरिद गर्नेक्रम बढेसंगै छोटो अवधिमा धेरै ग्यास उद्योगहरु बिक्री भएका हुन् ।