३० जेठ/ अर्थ र व्यापार – सोलुखुम्बुमा ४.७ मेगावाटको माथिल्लो जुनवेशी जलविद्युत आयोजना निर्माण हुने भएको छ । गोर्खाज हिमालयन हाइड्रोले सोलु दुधकुण्ड नगरपालिका भएर बग्ने कोन्जोक र बासा खोलामा यो आयोजना निर्माण गर्न लागेको हो ।

कम्पनीले उत्पादन अनुमतिपत्रका लागि विद्युत विकास विभाग समक्ष आवेदन दिएको छ। विभागले अनुमतिपत्र दिनु अघि सूचना निकालेर आयोजना निर्माण र संचालन गर्दा कुनै प्रतिकुल असर पर्ने भए ३५ दिनभित्र लिखित राय/सुझाव पेस गर्न सरोकारवाला निकायहरु आग्रह गरेको छ।
यो अर्ध–जलाशययुक्त जलविद्युत आयोजना हुने सो कम्पनीले जनाएको छ । यसको डिजाइन बहाव २.८ घनमिटर प्रतिसेकेण्ड र कुल हेड २०० मिटर हुनेछ भने यस आयोजनाबाट वार्षिक सरदर २८.८८ गिगावाट घण्टा विद्युतीय ऊर्जा उत्पादन हुने छ ।

कम्पनीका अनुसार यो आयोजनामा दुईवटा बाँध हुनेछन् । मुख्य बाँध कोन्जोक खोलामा हुनेछ । बासा खोलामा बनेको बाँधबाट कोन्जोक खोलाको बाँधबाट दायाँ पट्टिबाट इन्टेक, ग्राभेल ट्रयाप, क्यानल हुँदै बासा खोलाको डिस्चार्ज बाँधबाट कोन्जोक खोलामा खसालिनेछ । २०३० मिटर मुख्य सुरुङमार्ग निर्माण हुनेछ । ११० मिटर पेनस्टक पाइप राखिनेछ । २०८३ असोजबाट व्यवसायिक उत्पादन थाल्ने योजना छ ।