१२ चैत/अर्थ र व्यापार – सुपर मादी जलविद्युत आयोजना राष्ट्रिय प्रसारण लाइनमा जोडिएको छ । ४४ मेगावाट क्षमताको सुपरमादीको शनिबारदेखि १५ मेगावाट विजुली राष्ट्रिय प्रशारण लाइनमा जोडिएको हो ।
कास्कीको मादी गाउँपालिका वडा नम्बर १ र २ को बीचबाट बग्ने मादी नदीमा निर्माण भएको यो जलविद्युत आयोजना १३२ केभी प्रशारण लाइनको लेखनाथ सबस्टेसनमा जडान गरिएको सुपर मादी हाइड्रोपावर कम्पनीका कार्यकारी अध्यक्ष पुष्पज्योति ढुंगानाले जानकारी दिए ।
उनले ७ अर्ब ४७ करोड रुपैयाँ लागत अनुमान गरिएको आयोजनाको गत कोरोना, असारको बाढी र रुश युक्रेनको युद्धको असरले १ अर्बभन्दा बढी लगात थप भएको जानकारि दिए ।
यस आयोजनाले २ सय ४२ गिगावाट आवर प्रतिवर्ष २४ करोड २० लाख युनिट विद्युत उत्पादन गर्छ । २०७५ मंसिरबाट निर्माण सुरु भएको आयोजना परीक्षणपछि शनिबारबाट प्रशारण लाइनमा जोडिएको हो । आयोजनाले १५ दिन नेपाल विद्युत प्राधिकरणलाई निशुल्क विद्युत दिने छ ।
आयोजनाले दिउँदका ४ महिना प्रतियुनिट ८ रुपैयाँ ४० र बाँकी महिनामा ४ रुपैयाँ ८० पैसाका दरले विद्युत विक्री गर्ने छ । सुरुको वर्ष १ अर्ब ३० करोड रुपैयाँको विद्युत दिने छ भने आठौं वर्षमा पुग्दा १ अर्ब ५८ करोड रुपैयाँको प्रतिवर्ष उत्पादन गर्ने ढुंगानाले जानकारी दिए ।
भारतबाट प्रतियुनिट १२ रुपैयाँमा अहिले विद्युत् खरिद गर्नुपर्ने अवस्थामा सुपरमादी सञ्चालनले नेपाल सरकारलाई सहयोग पुग्ने उनको भनाइ छ । सानिमा बैंकको अगुवाइमा कुमारी बैंक, कृषि विकास बैंक, राष्ट्रिय वाणिज्य,एनआइडीसीएल र प्रभु बैंक लगायतको यस आयोजनामा लगानी छ ।
सुपर मादीका सञ्चालकले २ अर्ब १० करोड रुपैयाँ लगानी गरेका छन् । सुपर मादी स्वदेशी निजी क्षेत्रले निर्माण गरेको दोस्रो ठूलो आयोजनामा पर्ने कम्पनीको दाबी छ । साहस ऊर्जा लिमिटेडले निर्माण गरेको ८६ मेगावाटको सोलु–दूधकोसी सबैभन्दा ठूलो लगानीको आयोजना हो ।
आयोजनाको सिभिल निर्माणको ठेक्का सुरुमा हिमाल हाइड्रो एन्ड जनरल कन्स्ट्रक्सन लिमिटेडले लिएको थियो । तर, समस्या परेको भन्दै सो कम्पनीले कामको जिम्मा फेवा कन्स्ट्रक्सनलाई दिएको थियो ।