६ फाल्गुन / अर्थ र व्यापार- कुरिनघाटस्थित रिभरफन बिच रिसोर्टमा जीपलाईन सञ्चालनमा आउने भएको छ । त्रिशुली नदिमाथि ४ सय ६१ मिटर लामो जीपलाईनको मंगलवार शिलान्यास गरिएको छ । नदिमाथि यति लामो जीपलाईन सञ्चालनमा आएको यो एशियाकै दोस्रो भएको रिसोर्टले जनाएको छ । रिभरफन बिच रिसोर्ट काठमाडौंवाट ९९ किलोमिटर दुरीमा बट्टार,कुरिनघाटमा त्रिशुली नदि किनारमा अबस्थित छ ।
जीपलाईनमा एकैपटकमा दुई जना सम्मले यात्रा गर्न सक्नेछन । ४ सय ६१ मिटर लामो जीपलाईन ३५ सेकेन्डमा पार गर्न सकिने र यसमा यात्रुहरुले बेग्लै रोमाञ्चकारी अनुभव गर्न सक्ने रिसोर्टका प्रबन्ध निर्देशक शंकर अधिकारीले अर्थ र व्यापारलाई बताए । आगामी २०७८ बैशाखदेखि जीपलाईन सञ्चालनमा ल्याउने तयारी रहेको अधिकारीले वताए ।
करिब ४ करोडको लगानीमा रिसोर्टमा जीपलाईन सञ्चालनमा ल्याउन लागिएको हो । जीपलाईनको सुरुवात विन्दुमा बन्ने टावरमा रेष्टुरेण्ट,कफी शपका साथै भ्यु प्वाईन्ट समेत बनाईनेछ । त्यस्तै जीपलाईनको अन्तिम विन्दुमा पनि रेष्टुरेण्ट रहनेछ ।
रिभरफन बिच रिसोर्टलाई “गन्यव्य रिभरफन”कै रुपमा विकास गर्न रिसोर्टमा विभिन्न सेवा सुविधाहरु थप गरिएको प्रबन्ध निर्देशक अधिकारीले वताए । रिसोर्टमा १५० मिटर लामो स्काईरोप साईक्लिङ, अप्टिकल एण्ड रोप कोर्स लगायतका थप सेवाहरु पनि थप गरिएको छ । रिभरफनमा पर्यटकहरुलाई समग्र पर्यटन प्याकेज उपलब्ध गराउने रिसोर्टको योजना रहेको अधिकारीले वताए ।
“कोरानापछिको पर्यटन बजार र स्वदेशी तथा विदेशी सवै उमेर समुह र वर्गका पर्यटकहरुलाई लक्षित गरेर रिभरफन बिच रिसोर्टमा विभिन्न सेवाहरु थप गर्ने योजना बनाईएको हो”–रिसोर्टका निर्देशक राजन सिम्खडाले भने । पर्यटन क्षेत्रमा यो पूर्वाधारमा लगानी गर्ने समय हो, हामी पर्यटकहरुलाई अझ विशेष सेवा दिन तयार भएर बसेका छौं भन्ने सन्देश दिन पनि रिसोर्टमा विभिन्न आकर्षणहरु थप गरिएको सिम्खडाले बताए ।
तपाईको प्रतिक्रिया