५ फागुन /अर्थ व्यापार  - भेरी बबई बहुउद्देश्यीय आयोजनाको बाँधस्थलको पानीको गहिराइ नाप्न उच्चस्तरीय प्रविधि ‘इकोसाउन्डर’ मेसिन प्रयोग गरि सफल प्रयोग गरि पानीको गहिराइ नाप्ने नयाँ प्रविधि नेपाल भित्राइएको छ । यसको सफल प्रयोग भेरी बबई बहुउद्देश्यीय आयोजनामा पहिलोपटक गरिएको हो ।

अन्य बिकसित मुलुकहरुमा प्रयोग हुँदै आएको यो प्रविधि नेपालमा भने पहिलो पटक परामर्शदातृ संस्था इनोभेटिभ इन्जिनियरिङ सेर्भिसेज प्रा.लि.ले भित्राएको हो । संस्थाका प्रवन्ध निर्देशक अनुप खनालको अनुसार यो मेसिनले डी.जी.पी.एस. प्रविधिमा काम गर्ने भएकाले यसले गर्ने नाप जाँच अत्यन्तै विश्वासिलो हुनेछ । यो मेसिनलाई डुंगा र्वायाफ्टिङ बोटमा जडान गरी सजिलैसँग नदी तथा तालहरुको गहिराइ नाप्न सकिने खनालले बताए ।

यसअघि इनोभेटिभ इन्जिनियरिङ सेर्भिसेज प्रा.लि.ले नदी वा खोलाको एक किनारामा बसेर अर्को किनारासम्मको पानी नाप्न मिल्ने अन्तराष्ट्रियस्तरको ‘केबल वे’ प्रविधि निर्माण गरेको थियो । खोलाको सेडिमेन्टसमेत नाप्न सकिने यो प्रविधिलाई ३३५ मेगावाटको माथिल्लो अरुण र ३० मेगावाटको इखुवा खोला हाइड्रोपावर प्रोजेक्टमा प्रयोग गरिएको छ ।