८ फागुन /अर्थ र व्यापार - युनिभर्सल पावर कम्पनीले निष्काशन गरेको साधारण शेयर बुधबार बेलुकादेखि बन्द हुने भएको छ । कम्पनीले माघ २५ देखी फागुन ९ गते सम्मका लागी उक्त शेयर खुल्ला गरेको थियो । बिक्री प्रबन्धकले फागुन ७ गते मंगलबारसम्म निष्काशित भएको सबै शेयर बिक्री भएकाले बुधबार कार्यालय समय पश्चात आईपिओ बन्द गर्न लागेको जनाएको छ ।

युनिभर्सलको शेयर निष्काशन तथा बिक्री प्रबन्धक सिद्धार्थ क्यापिटलका अनुसार फागुन ७ गते मंगलबारसम्म हाइड्रोपावरको आईपिओमा एक लाख दुई हजार वटा आवेदन परेको छ । एक लाख २ हजार आवेदनबाट ८९ करोड ४४ लाख ४४ हजार रुपैयाँ बराबरको ८९ लाख ४४ हजार ४४० कित्ता शेयर माग भएको क्यापिटलले जनाएको छ ।

युनिभर्सल पावरले माघ २५ गतेदेखि आयोजना प्रभावित स्थानीय बासिन्दाहरुबाट अवितरित १७ लाख ६६ हजार १५० कित्ता समेत कूल ९३ लाख २७ हजार ४१० कित्ता आईपिओ सर्वसाधारणमा बिक्रीमा ल्याएको थियो । जसमध्ये एक लाख ८६ हजार ५४८ कित्ता शेयर कर्मचारीहरुलाई र ४ लाख ६६ हजार ३७० कित्ता सामूहिक लगानी कोषलाई छुट्याएर बाँकी रहेको ८६ लाख ७४ हजार ४९२ कित्ता आईपिओ सर्वसाधारणमा बिक्रीमा ल्याएको हो ।

इच्छुक लगानीकर्ताले कम्पनीको आईपिओमा न्यूनतम ५० देखि अधिकतम ५० लाख कित्तासम्म मेरो शेयर तथा धितोपत्र बोर्डबाट आश्वा अनुमति सदस्यता लिएको सम्पूर्ण बैंक तथा वित्तीय संस्थाबाट सि–आश्वा प्रणाली मार्फत फागुन ८ गते बुधबार कार्यालय समयसम्म मात्र आवेदन दिन सक्नेछन् ।युनिभर्सलको आईपिओलाई इक्रा नेपालले ‘ग्रेड ४’ रेटिङ्ग दिएको छ । जसले कम्पनीको वित्तीय अवस्था औसतभन्दा कमजोर रहेको बुझिन्छ । दोलखामा ११ मेगावाट क्षमताको तल्लो खारेखोला आयोजना निर्माण गरिरहेको कम्पनीको ८० प्रतिशत बढी निमार्ण कार्य सम्पन्न भईसकेको छ ।

कम्पनीमा ८८ प्रतिशत सीईडीबी हाइड्रो फण्ड लिमिटेडको शेयर स्वामित्व छ । आयोजना बनाउन प्रतिमेगावाट १८ करोड ६० लाख रुपैयाँका दरले २ अर्ब ४ करोड ६० लाख रुपैयाँ लाग्ने अनुमान गरिएको छ । यसको विद्युत उत्पादन अनुमतिको बाँकी अवधि २९ वर्ष रहेको छ । हाल कम्पनीको चुक्ता पूँजी एक अर्ब १३ करोड ४१ लाख ८९ हजार रुपैयाँ र जारी पूँजी दुई अर्ब १० करोड तीन लाख ५० हजार रूपैयाँ छ। कम्पनीले आगामी आर्थिक वर्ष २०७६र७७ मामा १९ करोड ५३ लाख र आव २०७७र७८ मा २१ करोड ९८ लाख रुपैयाँ खुद नाफा कमाउने प्रक्षेपण गरेको छ ।