९ माघ/अर्थ र व्यापार– उखु किसानले तोकिएको मितिमा उखुको सम्पूर्ण भुक्तानी नदिएको भन्दै पुनः आन्दोलन गर्ने बताएका छन् ।
उखु किसानले एक विज्ञप्ति जारी गर्दै उद्योग मन्त्रालयको सम्झौतामा उल्लेख भएको समय सीमा समाप्त भैसकेको तर हालसम्म पनि उखु किसानको सम्पूर्ण रकम भुक्तानी नपाएको जनाएको छ ।
गत पुस १३ गते २१ दिनभित्र उखु किसानहरूको सम्पूर्ण बाँकी बक्यौता रकम भुक्तानी गर्ने गरी उखु किसान संघर्ष समिति र नेपाल सरकार, उद्योग वाणिज्य तथा आपूर्ति मन्त्रालयबीच सम्झौता भएको थियो ।
उखु किसान संघर्ष समितिका सचिव हरिश्याम रायले हालसम्म मन्त्रालयले कुन किसानहरूले कति रकम उद्योगीबाट पाउनु पर्ने र भुक्तानी पाइसकेको किसानहरूको विवरण चिनी उद्योगीबाट सार्वजनिक गराउन नसकेको बताए ।
किसानहरूको बाँकी भुक्तानी रकम र भुक्तानी पाइसकेको किसानहरूको विवरण सार्वजनिक नगर्नुले मन्त्रालयले दिएको मौखिक सूचनाबाट शंका उब्जिएको विज्ञप्तिमा उल्लेख छ ।
उखु किसानले तोकिएको मितिमा सबै भुक्तानी नपाएपछि संघर्षका कार्यक्रम समेत सार्वजनिक गरेका छन् ।
किसानहरुले पहिलो चरणमा माघ १० देखि फागुन ७ गतेसम्म किसान जागरण अभियान गर्ने, दोस्रो चरणमा फागुन ८ देखि १४ गतेसम्म कालोपट्टी बाँधेर खेतमा काम गर्ने, तेस्रो चरणमा फागुन १५ देखि २१ गतेसम्म एकछाक भोकै बसी काम गर्ने र चौंथो चरणको आन्दोलन घोषणा गर्ने रहेको विज्ञप्तिमा उल्लेख छ ।
तपाईको प्रतिक्रिया