२५ जेष्ठ / अर्थ र व्यापार- सरकारले नेपालको विभिन्न स्थानमा पदयात्रा तथा पर्वतारोहणमा जाने पर्यटकहरुको उद्धारको नाममा ठगी भईरहेको भन्दै यस सम्बन्धमा अनुसन्धान,छानविन र आवश्यक कारवाहीको सिफारिस गर्न गठन गरेको कार्यदलले जेष्ठ २७ गते आईतवारवाट काम थाल्ने भएको छ ।

गत जेष्ठ २१ संस्कृति, पर्यटन तथा नागरिक उड्ड्यन मन्त्रालयले  ५ सदस्यीय एक समिति गठन गरेको थियो । मन्त्रालयका सहसचिव घनश्याम उपाध्यायको संयोजकत्वमा गठित कार्यदलको सदस्यहरुमा पर्यटन विभागका महानिर्देशक, डिआइजी मनोज न्यौपाने, नेपाल नागरिक उडड्यन प्राधिकरणका उपनिर्देशक सुभाष झा र मन्त्रालयका उपसचिव प्रकाश शर्मा ढकाल छन । कार्यदलको सदस्य सचिवको जिम्मेवारी ढकाललाई दिईएको छ ।

अर्थ र व्यापार संग कुरा गर्दै कार्यदलका सदस्य सचिव समेत रहेका मन्त्रालयका उपसचिव प्रकाश शर्मा ढकालले आईतवार कार्यदलको पहिलो बैठक बस्ने जानकारी दिए । मन्त्रालयले पर्यटकहरुलाई लेक लाग्ने लगायतका स्वास्थ्य समस्या तथा अन्य विपतको उद्धारको नाममा ट्रेकिङ,ट्राभल्स कम्पनी, हेलिकप्टर सेवा प्रदायक संस्था र अस्पताल समेतको मिलेमतोमा फर्जी विवरण तयार गरी बीमा रकम दाबी गर्ने र ठगी गर्ने गुनासो र समाचार आएपछि समिति गठन गरेको जनाएको छ । सो सम्बन्धमा ट्रेकिङ,ट्राभल्स कम्पनी, हेलिकप्टर सेवा प्रदायक संस्था र अस्पताल लगायतका आवश्यकता अनुसारका सवै संस्थाको अध्ययन र छानविन हुने ढकालले वताए ।

कार्यदललाई आगामी आषढ १५ भित्र आवश्यक अनुसन्धान,छानविन गरी सत्यतथ्य पत्ता लगाई समस्या निराकरणको लागी उपाय,विधि र कारवाहीको समेत सिफारिस गर्न निर्देशन दिईएको छ ।