६ श्रावण/अर्थ र व्यापार- संस्कृति,पर्यटन तथा नागरिक उड्ड्यन मन्त्री रविन्द्र अधिकारीले नेपालमा पर्यटक उद्धारका नाममा ठगी गर्नेहरुको अनुसन्धान थालेपछि विश्वभर नेपालको वारेमा सकारात्मक सन्देशहरु जान थालिसकेको वताएका छन । आईतवार ट्रेकिङ एजेन्सिज एशोशियसन अफ नेपाल (टान)ले आयोजना गरेको अन्तरक्रिया कार्यक्रममा बोल्दै मन्त्री अधिकारीले नेपालको पर्यटन क्षेत्र दुई–चार वर्षलाई चलाएर खाने क्षेत्र नभएको र आगामी धेरै पुस्ताले यो व्यवसाय गर्नुपर्ने भएकोले यहाँ भित्रका समस्याहरुको समाधान गर्नुपर्ने वताएका हुन ।

आँफुकहाँ विभिन्न कुटनितिक निकायहरु वाट पनि नेपालमा पर्यटक उद्धारका नाममा ठगी भईरहेको जानकारी आएपछि यस सम्बन्धमा अध्ययन गर्न कार्यदलको गठन गरेको मन्त्री अधिकारीले वताए । “भएका समस्याहरु लुकाएर राखेपनि एक दिन त्यो बाहिर आईहाल्छ,वरु त्यसलाई बेलैमा समाधान गर्नुपर्छ”–मन्त्री अधिकारी भने । मन्त्रालयले पदयात्रामा गएका पर्यटकहरुको उद्धारका नाममा ठगी भईरहेको भन्दै यसवारे अध्ययन गर्न मन्त्रालयका सहसचिव घनश्याम उपाध्यायको नेतृत्वमा एक कार्यदलको गठन गरेको थियो । 

कार्यक्रममा बोल्दै मन्त्री अधिकारीले कार्यदलको रिपोर्ट चाँडै आउने र संगसगै कार्वाही प्रक्रिया पनि अगाडि वढाईने वताए ।“फेक रेस्क्युको सम्बन्धमा गलत काम गर्नेलाई कार्वाही गरिन्छ,असल काम गर्नेहरु डराउनुपर्दैन,सवैलाई एकै ठाउँमा राखेर हेरिँदैन”–मन्त्री अधिकारीले भने ।

संस्कृति,पर्यटन तथा नागरिक उड्ड्यन मन्त्रालयका सचिव कृष्णप्रसाद देवकोटाले यो व्यवसायमा संलग्न केहि प्रतिशत टाठावाठाहरुले यो धन्दा चलाएको वताए ।“बेलुका खाना खाएर सुतेको मान्छेलाई भोलिपल्ट उठ्दा पखाला लगाउने वनाउन खानामा त्यस्तो चिज मिसाएर खुवाउने गरिएको पनि देखियो”–त्यस्ता गलत काम गर्नेहरुलाई कार्वाही गरेरै छाड्ने सचिव देवकोटाले वताए । करियर धेरै माथिसम्म पुग्नुपर्ने व्यक्तिहरुको कार्यदलको सदस्य भएका कारण कार्यदलले उपयुक्त प्रतिवेदन दिने अपेक्षा पनि सचिव देवकोटाले गरे । 

कार्यक्रममा ट्रेकिङ एजेन्सिज एशोशियसन अफ नेपाल(टान) का अध्यक्ष नवराज दाहालले मन्त्रालयले यस सम्बन्धमा थालेको अनुसन्धान स्वागतयोग्य काम भएपनि विश्वभर नेपालको वारेमा गलत प्रचार भएको वताए । कार्यक्रममा नेपाल पर्यटन वोर्डका सदस्य दिपक महत, नाट्टाका अध्यक्ष सि.एन पाण्डे,पर्यटन व्यवसायिहरु पम्फा धमला,कुलबहादुर गुरुङ,तिलक लामा,यांकिला शेर्पा लगायतले पर्यटन व्यवसायमा भएका विभिन्न समस्याहरु वारे मन्त्री अधिकारीलाई जानकारी गराएका थिए ।