१ माघ / अर्थ र व्यापार- दुईपांग्रे सवारीलाई भाडामा प्रयोग गरिने प्लेटफर्म ‘पठाओ’ र ‘टुटल’सँग आवद्ध चालकहरूको संख्या २० हजारभन्दा बढी रहेको प्रहरीले अनुमान गरेको छ । यसरी ठूलो संख्यामा निजी सवारीहरु मोटरसाइकल र स्कुटर प्रयोग हुँदा समेत नियामक निकाय यातायात व्यवस्था विभाग भने मौन देखिएको छ । 

टुटलले दुई वर्षअघि र पठाओले करिब १ वर्ष देखि यस्तो कार्य गरिरहेका छन् । तर, विभागले यसविरुद्ध कुनै कदम चालेको पाइँदैन । ट्राफिक प्रहरीले भने गैरकानुनी कार्य गर्ने यस्ता मोटरसाइकलहरूलाई नियन्त्रणमा लिन थालेको हो । हालसम्म प्रहरीले करिब एक दर्जन मोटरसाइकल नियन्त्रणमा लिइसकेको दरबारमार्ग ट्राफिक बिटका प्रहरी निरिक्षक दयाकृष्ण भट्टले जानकारी दिए ।  दरबारमार्ग ट्राफिक बिटका प्रहरी निरिक्षक दयाकृष्ण भट्टले यस सम्बन्धमा विशेष अपरेसन नै सञ्चालन गरेका थिए । “हामीले सम्बन्धित कम्पनीका जिम्मेवार व्यक्तिहरूलाई बोलाएर सम्बन्धित निकायबाट सञ्चालनको अनुमति लिएरमात्र यस्तो कार्य गर्न भनेका छौं”–भट्ट्ले भने ।

सवारी तथा यातायात व्यवस्था ऐन २०४९ को दफा ८ को उपदफा १ मा निजी प्रयोगको लागि दर्ताको प्रमाण पत्र प्राप्त सवारीलाई निजी सवारी भनिने छ । त्यस्तै उक्त दफाको उपदफा २ मा ‘निजी सवारी यातायात सेवाको लागि प्रयोग गर्न पाइने छैन’ भनी स्पष्ट रुपमा उल्लेख गरिएको छ । निजी सवारी भन्नले रातो प्लेटमा सेतो अक्षर र अंक हुनु पर्नेछ भनी ऐनको अनुसूची २ को खण्ड ‘ग’मा लेखिएको छ । हालको ऐन कायम रहँदा सम्म निजी सवारीले यात्रु ओसारपसार गर्न नमिल्ने प्रहरी निरिक्षक दयाकृष्ण भट्टले वताए ।