१२ फागुन /अर्थ र व्यापार - साताको पहिलो दिन आइतबार नेप्सेमा दोहोरो अंक (१०.७५) को गिरावट आउँदा सूचक गत फागुन ६ गतेको भन्दा तल ११०२.३२ बिन्दुमा झरेको छ । सूचक घटेपनि गत बिहीबारको तुलनामा कारोबार रकममा भने केही सुधार आएको छ । गत बिहीबार १६ करोड ४४ लाख रुपैयाँको कारोबार भएको बजारमा आइतबार भने ४ करोड ५५ लाख रुपैयाँले बढेर २० करोड ९९ लाख ८७ हजार रुपैयाँ बराबरको कारोबार भएको हो । आइतबार १६६ कम्पनीका ६ लाख ९८ हजार ५४२ कित्ता शेयर किनबेच भयो ।

कारोबारमा आएका १० उप(सूचकमध्ये उत्पादन तथा प्रशोधन मात्रै सकारात्मक देखिएको छ। बाँकी सबै समुहको सूचक ओरालो लागेका छन् । उत्पादन तथा प्रशोधन समुहको सूचक ३३.२ अंकले बढेको छ । आइतबार निर्जीवन बीमा समुहको सूचक सबैभन्दा धेरै ६९.२ अंकले घटेको छ। यस्तै जीवन बीमा ६१, माइक्रोफाइनान्स २०.७२, होटल १९.१३, अन्य १०.९७, हाइड्रोपावर ९.३२, वाणिज्य बैंक ९.०१, विकास बैंक ५.२६ र फाइनान्स ०.६७ अंकले ऋणात्मक बनेका छन् ।

घटेको बजारमा एनआईसी एशिया बैंकको शेयरमूल्य घटेर उच्च कारोबार भएको छ। बैंकको शेयरमूल्य प्रतित्ता १४ रूपैयाँले एक करोड ३७ लाख रुपैयाँ कारोबार भएको हो । यस्तै नबिल बैंकको एक करोड २३ लाख शिखर इन्स्योरेन्सको एक करोड ३ लाख चौतारी लघुवित्तको एक करोड ३ लाख, अपर तामाकोशीको एक करोड २ लाख र नेपाल बैंकको एक करोड रुपैयाँ बराबरको कारोबार भयो । बाँकी कुनै पनि कम्पनीको कारोबार रकम करोड नाघ्न सकेन ।

आइतबार युनिलिभर नेपालको शेयरमूल्य सबैभन्दा धेरै ४.०३ प्रतिशतले बढेको छ । आइतबारको बजारबाट एक्सेल डेभलपमेन्ट बैंकको शेयरधनीले ३.९९ प्रतिशत र एनएमबि हाइब्रिड फण्डको इकाईधनीले ३.२१ प्रतिशतले कमाएका छन् । यस्तै शाइन रेसुङ्गा डेभलपमेन्टको शेयरमूल्य २.११ र सिटिजन म्युच्युअल फण्डको इकाई मूल्य २ प्रतिशतले बढेको छ । राधी जलविद्युत, अपि पावर, मितेरी डेभलपमेन्ट बैंक, महुली सामुदायिक लघुवित्त, र सिद्धार्थ इक्वीटी फण्डको इकाईमूल्य एक प्रतिशत भन्दा बढीले सकारात्मक भएका छन् ।

यता किसान माइक्रोफाइनान्सको शेयरमूल्य सबैभन्दा धेरै ७.५४ प्रतिशतले घटेको छ । आइतबारको बजारबाट भार्गव विकास बैंक र सर्पोट माइक्रोफाइनान्सको शेयरधनीले ६ प्रतिशतभन्दा बढीले गुमाएका छन् । घलेम्दी हाइड्रो, वोमी माइक्रोफाइनान्स, ओरेन्टल होटल, खानीखोला हाइड्रोपावरको शेयरमूल्य ४ प्रतिशतभन्दा बढीले घटेका छन् ।