१४ असोज/अर्थ र व्यापार– सडक डिभिजन तुम्लिङगटार, संखुवासभाले ठेक्का लिएर समयमै काम सम्पन्न नगर्ने ठेकेदार कम्पनीसंगको सम्झौता रद्द गर्ने तयारी गरेको छ ।  

बुधबार सडक डिभिजन तुम्लिङगटार, संखुवासभाले चार ठेकेदार कम्पनीलाई सात दिनभित्र स्पष्टीकरण सहित उपस्थित हुन निर्देशन दिएको छ ।

सडक डिभिजन तुम्लिङगटारका अनुसार कान्छाराम एण्ड जेभी, मुना कन्स्ट्रक्सन एण्ड विल्डर्स प्रा. ली., पुष्पाञ्जली कन्स्ट्रक्सन, कुन्सालिङग कन्स्ट्रक्सन प्रा.ली. लाई सात दिनभित्र स्पष्टीकरण सहित उपस्थित हुन निर्देशन दिएको हो । 

सडक डिभिजन तुम्लिङगटारले बुधवार एक सुचना जारी गर्दै यि चार निर्माण कम्पनीहरु सडक डिभिजन कार्यालयको सम्पर्कमा नरहेको हुदा सार्वजनिक खरिद ऐन २०६३ संशोधित सहितको दफा ५९ (७) (८) अनुसार सम्झौता अन्त्य गरि क्षतिपूर्ति समेत असुल उपर गर्न र दफा ६३ अनुसार कालो सुचीमा राख्नुपर्ने कुनै कारण नभए सातदिनभित्र स्पष्टीकरण सहित उपस्थित हुन निर्देशन दिइएको हो । 

उपस्थित नभएमा सोही दफा अनुसार कारबाही हुने व्यहोरा समेतको सूचना सडक डिभिजनले सार्वजनिक गरेको छ ।

कान्छाराम एण्ड जेभी, मैजुबहाल, काठमाडौंले कोशी राजमार्ग अन्तर्गतको वसन्तपुर-चैनपुर सडकको ठेक्का लिएर काम गरेको छैन ।

कुन्सालिङग कन्स्ट्रक्सन प्रा.ली. भोजपुरले मवादिन ननधाकी सडक (संखुवासभा) सडक अन्तर्गत यवरा खोलामा पुल निर्माणको जिम्मा लिएर काम गरेको छैन ।

यस्तै, मुना कन्स्ट्रक्सन एण्ड विल्डर्स प्रा. ली. तनहुँले अरुण नदीको कात्तिकेघाटमा फेरी स्थापनाको जिम्मा लिएर काम गरेको छैन ।

त्यसैगरी, पुष्पाञ्जली कन्स्ट्रक्सन घट्टेकुलो काठमाडौंले पनि चैनपुरबाट जलजला (संखुवासभा) सडक अन्तर्गत हेवा खोला नदीमाथि पुल बनाउने जिम्मा लिएर काम नगरेको हो ।

यि चार कम्पनीहरुले योजना निर्माणको सम्झौता तथा शर्तहरु अनुसार प्रगति नगरेको र पटक पटक ताकेता गर्दा समेत काम पुन सुरु गरि समयमै सक्नेतर्फ कुनै चासो नदेखाएको सुचनामा उल्लेख छ ।