२५ जेठ /अर्थ र व्यापार- नक्कली मूल्य अभिवृद्धि कर (भ्याट) बिल प्रयोग गर्ने कम्पनीमाथि राजस्व अनुसन्धान विभागले अनुसन्धानमा सक्रियता बढाएको छ । त्यसैक्रमममा विभागले सोमबार मात्रै ६ कम्पनीको अनुसन्धान सकेर मुद्दा दायर गरेको छ । २०७० देखि २०७५ सम्म नक्कली भ्याट बिलको अधिक बिगबिगी रहेको विभागले जनाएको छ । विभागले हाल ८ सय वटाभन्दा बढी कम्पनीविरुद्ध छानबिन गरिरहेको जनाएको छ ।
सोमबार विभागले नक्कली भ्याट बिल प्रयोग गरेको आरोपमा ग्लोबल इम्पेक्स इन्टरनेशनलका प्रोप्राइटर किसनकुमार अग्रवाल विरुद्ध पाटन उच्च अदालतमा मुद्दा दायर गरेको छ । मुद्दामा उनीविरुद्ध ४ करोड ७ लाख बिगो माग दाबी गरिएको छ । त्यस्तै एसएन इन्टरनेशनलका प्रोप्राइटर रामनिवास अग्रवाल विरुद्ध ४ करोड ५२ लाख बिगो माग दाबी गरिएको छ । सीमा क्षेत्रबाट भन्सार जाँच पास नगराई श्यामकुमार बानियाँ समेत दुई जनाले राजस्व चुहावट गरेको अभियोगमा ५ करोड ५० लाख माग दाबी गरिएको छ । यी दुईविरुद्ध उच्च अदालत तुलसीपुरमामा मुद्दा दर्ता गरिएको हो ।
त्यसैगरी भुसा सप्लायर्सका सञ्चालक दीपेन्द्रप्रसाद कलवार समेत ४ जनाले भन्सार चोरी पैठारी गरी राजस्व चुहावट गरेको अभियोगमा १ करोड २२ लाख माग दाबी सहित उच्च अदालत जनकपुरको अस्थायी इजलास वीरगंजमा मुद्दा दायर गरेको छ । त्यस्तै सत्यनारायण प्रसादले आयकर छली गरेको भन्दै ९९ लाख माग दाबी सहित उच्च अदालत पाटनमा मुद्दा दर्ता गरिएको छ । अमनकुमार तिवारीले भन्सार चोरी पैठारी गरी राजस्व चुहावट गरेको अभियोगमा उच्च अदालत जनकपुरको अस्थायी इजलास वीरगंजमा मुद्दा दायर गरिएको छ ।
तपाईको प्रतिक्रिया