३ फागुन /अर्थ र व्यापार - ओरियण्टल होटल्सले चालु आर्थिक वर्षको त्रैमासमा दोस्रो त्रैमासमा १३ करोड ३९ लाख रुपैयाँ खुद नाफा आर्जन गरेको छ । होटल ¥याडिसन सञ्चालन गरेको यस कम्पनीले आफ्नो खुद नाफा गत पुसको तुलनामा एक करोड ६४ लाख अर्थात १४ प्रतिशतले वृद्धि गरेको हो । गत वर्षको दोस्रो त्रैमासमा ओरियण्टल होटलले ११ करोड ७५ लाख रुपैयाँ खुद नाफा आर्जन गरेको थियो ।

होटलले यस अवधिमा व्यवसाय तथा सेवाको बिक्री मार्फत ५६ करोड ९३ लाख २९ हजार रुपैयाँ आम्दानी गरेको छ । गत वर्षको यसै अवधिमा ५२ करोड ९४ लाख रुपैयाँ आम्दानी गरको थियो । यस्तै यस अवधिमा होटलले २० करोड १९ लाख रुपैयाँ होटल सञ्चालनबाट नाफा कमाएको छ ।

होटलले १४ करोड ३९ लाख कर्मचारीलाइ खर्च गरेको छ भने ६ करोड ६३ लाखको खाध्यान्न र पेय पदार्थ खरिद गरेको छ । ८ करोड १९ लाख सञ्चालन र  ३ करोड ९८ लाख ह्रासकट्टी र ७ करोड ८८ लाख रूपैयाँ साधारण तथा कार्यालयमा खर्च गरेको छ । एक अर्ब ७ करोड ४३ लाख रुपैयाँ चुक्ता पूँजी रहेको होटलले १५ प्रतिशत बोनस शेयर पूँजीकरण गरेर ९३ करोड ४२ लाखबाट पूँजी वृद्धि गरेको हो। यस अवधिमा जगेडा कोषमा एक अर्ब ७९ लाख ६८ हजार रुपैयाँ सञ्चित छ। गत पुसमा ९३ करोड ६३ लाख रुपैयाँ रहेको थियो ।

यस अवधिमा कम्पनीको प्रतिशेयर आम्दानी वार्षिक २४ रुपैयाँ ९४ पैसा छ भने प्रतिशेयर नेटवर्थ १९३ रुपैयाँ ८२ पैसा र मूल्य आम्दानी अनुपात १७.५२ गुणा बढी छ ।