२४ असार/अर्थ र व्यापार– भारतमा अलैंची उत्पादन घटेसंगै नेपाली अलैंचीको भारतीय वजारमा उच्च माग भएको छ । 

नेपाली अलैंचीको मागमा दोब्बर बृद्धी भएसंगै चालु आर्थिक वर्षको ११ महिनामा अलैंचीको निर्यात पनि ७ अर्ब ५० करोड रुपैयाँको हाराहारीमा पुगेको छ । 

नेपाल अलैंची व्यवसायी संघका अध्यक्ष राजकुमार कार्कीले आर्थिक वर्ष २०७६/७७ को तुलनामा अलैंचीको निर्यात झन्डै दोब्बरले वृद्धि भएको बताए । कार्कीले भारतमा अलैंची उत्पादन घट्नु र अलैंचीलाई अत्यावश्यक वस्तुका रूपमा राखिएपछि नेपालबाट निर्यातमा भारी वृद्धि भएको जानकारी दिए ।

कार्कीका अनुसार कुल उत्पादनमध्ये अझै करिब १० देखि १५ प्रतिशत अलैंची स्टक बाँकी रहेकोले उक्त स्टक पनि निर्यात गर्दा ८ अर्ब भन्दा बढीको निर्यात हुने अनुमान गरिएको जानाकारी दिए । नेपालमा वार्षिकरूपमा एक लाख २० हजार बोराभन्दा बढी अलैंची उत्पादन हुने गरेको छ ।

गत वर्ष  करिब ४ अर्ब रुपैयाँको निर्यात भएकोमा संघले यस बर्ष ६ अर्ब रुपैयाँको अलैंची निर्यात हुने लक्ष्य राखेको थियो । चालु आर्थिक वर्षमा नेपालबाट भटमासको तेलपछि अलैंचीको निर्यात सबैभन्दा बढी रहेको छ।

विश्व बजारमा नेपाली अलैंची गुणस्तरीयमा पर्छ । नेपालबाट भारत निर्यात हुने कृषि उपजमध्ये सर्वाधिक राम्रो भाउ पाउनेमा अलैंची पर्छ । अलैंचीको प्रयोग बिस्कुट, बिभिन्न प्रकारका मसला, सुगन्धित तेल, बेकरीका परिकार र मदिरामा प्रयोग गरिन्छ ।

नेपाली अलैंचीको माग बढेसंगै मूल्य पनि उल्लेख्य मात्रामा बृद्धी भएको छ । ५ वर्षपछि प्रतिकेजी २५० रुपैयाँसम्म बढेर प्रतिकेजी ८७५ रुपैयाँसम्म पुगेका नेपाल अलैंची व्यवसायी संघले बताएको छ ।

वर्षाका कारण भारतमा अलैंचीको मागमा कमि आएसंगै केही दिनयता मूल्य घटेर प्रतिकेजी ८ सय रुपैयाँमा आइपुगेको छ । गत महिना प्रतिमन ३५ हजार रुपैयाँ पुगेको अलैंची अहिले प्रतिमन ३२ हजारमा झरेको छ ।