८ फागुन /अर्थ र व्यापार  - जापान सिभिल एभिएसन ब्यूरोबाट उडान अनुमति पाएको ४५ दिनपछि नेपाल वायुसेवा निगमले जापान उडान गर्न पाउने भएको छ । निगमको जापान उडान अनुमति प्रक्रिया अन्तिम चरणमा पुगेको जनाउँदै उडानका लागि आवश्यक पूर्वाधार भने तयार भइसकेको जनाएको छ । हाल जापान उडानका लागि निगमबाट परिचालित कन्ट्री म्यानेजरले सबै व्यवस्था मिलाइसकेका छन् । अहिले जेक्याबले पठाइएको डकुमेन्ट अध्ययनको क्रममा छ । 

निगमका अनुसार ग्राउण्ड ह्याण्डलिङ, लाइन मेन्टिनेन्स, इन्जिनियरिङ, क्याटरिङ, होटल र फ्युलिङको बन्दोबस्त भइसकेको छ । जापानमा निगमको सम्पर्क कार्यालय एक साता भित्रै तयार हुने बताइएको छ । 

जापानबाट नियमित उडान अनुमति पाएलगत्तै निगमसँग भएको दुई सय ७४ सीटे एयरबस ३३०मार्फत काठमाडौं–ओशाका उडान गर्नेछ । सुरुमा ओशाका उडान गर्न लागेको निगमले छिट्टै नारिता पनि उडान गर्न योजना बनाएको छ । निगमले दुई साताअघिनै नेपाल नागरिक उड्डयन प्राधिकरणबाट काठमाडौं–जापान उडान अनुमति भने पाइसकेको छ ।