१८ पुष / अर्थ र व्यापार- आगामी पुस २८ (जनवरी १२ तारिख) का दिन हुने नेपाल एसोसिएसन अफ टुर एन्ड ट्राभल एजेन्ट्स (नाट्टा) को निर्वाचनको लागी आकांक्षी ट्राभल व्यवसायिहरुको छलफल अगाडी बढेको छ । आ–आफ्नो प्यानल निर्माणका लागी व्यवसायिहरुको प्रयास भईरहेको छ । 

यसपटक नाट्टाको नेतृत्व लिनका लागी नाट्टाका प्रथम उपाध्यक्ष सि.एन.पाण्डे,नाट्टाका पूर्व महासचिव अच्युत गुरागाईं र मिहिका धाख्वाको चर्चा रहेको छ । यस अघि नाट्टा नेतृत्वका लागी सहमतिको प्रयास भए पनि त्यो सम्भव नभएको छलफलमा सहभागी व्यवसायीहरुले अर्थ र व्यापारलाई वताए ।

यसअघि विभिन्न व्यवसायिक समुह बनाएर निर्वाचनमा जाने ट्राभल व्यवसायिहरु दुई वर्ष अगाडी देखि भने राजनीतिक रुपमा प्यानल बनाएर जान थालेका हुन । यस पटक पनि नाट्टामा राजनीतिक प्यानलहरु बन्ने प्रष्ट छ । 

नाट्टाका अध्यक्षका आकांक्षी सि.एन.पाण्डे लाई नेकपा एमाले÷एमाओवादी निकट र स्वतन्त्र व्यवसायिहरुको समर्थन रहने देखिएको छ । यद्यपी पाण्डे एमाले निकट व्यवसायिहरु भित्रै देखिएको फाटोलाई मिलाउन लागीपरेको बुझिएको छ । एमाले निकट ट्राभल व्यवसायिहरुको एउटा समुह सि.एन. लाई अध्यक्ष नमान्ने पक्षमा लागेकोले त्यसलाई मिलाउने उनको प्रयत्न रहेको बुझिएको छ ।

यता अध्यक्षका अर्का सदाबहार आकांक्षी अच्युत गुरागाईंले पनि यसपटक अध्यक्ष बन्ने ईच्छा राखे पनि यसपटक पनि उनले प्रथम उपाध्यक्षमै चित्त बुझाउनु पर्ने देखिएको छ । अध्यक्ष बन्न राम्रै कसरत गरेका गुरागाईंलाई ठूला विजनेश हाउसहरुले नपत्याएको ट्राभल व्यवसायिहरु माझ चर्चा चलेको छ । गुरागाईंलाई सि.एन समुहले पनि प्रथम उपाध्यक्षको लागी प्रस्ताव गरिरहेको जानकारीमा आएको छ । यद्यपी राजनीतिक रुपमा नेपाली कांग्रेस निकट भएकोले गुरागाईंलाई पाण्डे समुहमा जान पनि समस्या र अध्यक्षकै अर्का उम्मेदवार मिहिका धाख्वाको प्रथम उपाध्यक्षमा जान पनि उनलाई समस्या रहेको बुझिएको छ । 

यता अध्यक्षका अर्का उम्मेदवार मिहिका धाख्वाको अध्यक्ष बन्ने चाहना पनि उत्तिकै छ । नाट्टाको संस्थापन समुहको विरोधी समुह फेरि यसपटक पनि मिहिकालाई नै अध्यक्ष उठाउने पक्षमा छ । उनी यसभन्दा अगाडी मधुसुदन आचार्य संग अध्यक्षमा पराजत भएकी थिईन । धाख्वा अच्युत गुरागाईंलाई प्रथम उपाध्यक्ष बनाएर नयाँ शक्ति र कांग्रेसका असन्तुष्टहरुलाई समेटेर प्यानल बनाउन प्रयासरत छिन । 

नाट्टा निर्वाचनका लागी विभिन्न ढंगले छलफलहरु भईरहेको जानकारीमा आएको छ । नाट्टाको निर्वाचनमा विशेष गरि विग हाउसहरु,पूर्व अध्यक्षहरु र विभिन्न राजनीतिक दल निकट व्यवसायिका संस्थाहरुको भुमिका हुने गर्दछ । यसपटक नाट्टाका पूर्व अध्यक्षहरु अर्जुन शर्मा सि.एन पाण्डेको पक्षमा देखिएका छन भने अर्का पूर्व अध्यक्ष पवित्रकुमार कार्की गुरागाईंको पक्षमा भए पनि गुरागाईं अध्यक्ष वाट पछाडी हटे पछि उनले मिहिका लाई समर्थन गर्छन वा पाण्डेलाई,त्यो स्पष्ट छैन । नाट्टाका पूर्व अध्यक्ष डि.बि लिम्बु धाख्वाको पछाडी भए पनि उनको पक्षमा पूर्व अध्यक्षहरु कम समर्थनमा देखिएका छन । 

४७२ जना मतदाता रहेको नाट्टाको मनोनयन पुष २३ गते आईतवार रहेकोले शुक्रवार सम्म सवै प्यानलहरु तयार हुने देखिएको छ । सवैलाई समेटेर प्यानल निर्माण गर्न व्यवसायिहरुले पहल गरिरहेका छन ।