२९ माघ / अर्थ र व्यापार- पूर्व सञ्चारमन्त्री तथा नेकपा माओवादीका नेता अग्निप्रसाद सापकोटाले नेपालमा ५० लाख पर्यटक भित्र्याउनका लागि पूर्वाधारण निर्माण तथा प्रवद्र्धनात्मक योजना बनाएर अघि बढ्नुपर्ने वताएका छन । समग्र पर्यटन पत्रकारहरुको छाता संस्था राष्ट्रिय पर्यटन पत्रकार संघ (नाटोज) को सोमबार राजधानीमा सम्पन्न पाँचौ वार्षिक साधारणसभामा बोल्दै उनले मुलुक सम्बृद्धिको दिशातर्फ अगाडी बढिरहेको मुलुकको आर्थिक सम्बृद्धिको प्रमुख आधार पर्यटन रहेको वताए ।

नेपाली कांगे्रसका केन्द्रीय सदस्य तथा यूवा नेता प्रदिप पौडेलले पर्यटन विकासका लागि नयाँ योजनाका साथ अघि बढ्नुपर्ने बताउँदै पूर्वाधार निर्माणमा राज्यले विशेष जोड दिनुपर्ने वताए । “राज्यले यति पर्यटक ल्याउछु र उत्ति पर्यटक ल्याउछु भनेर लक्ष्यमात्रै लिएर पर्यटन विकास हँदैन, त्यसका लागि आधार तय गरिनुपर्छ”–पौडेलले भने ।

कार्यक्रममा नेपाल पर्यटन बोर्डका सञ्चालक समिति सदस्य दिपक महतले पर्यटन पत्रकारहरुसँगको समन्वय र सहकार्य गरेर अघि बढ्ने वताए । त्यस्तै नेपाल पर्यटन बोर्ड सञ्चालक समितिका पूर्व सदस्य राजेन्द्र प्रसाद सापकोटाले पर्यटन पत्रकारहरुले दुरदराजका समाचार लेख्ने वातावरण सिर्जना गरिनुपर्नेमा जोड दिए । उहाँले ५० लाख पर्यटक भित्र्याउने कुरा तत्काल सम्भव नभएको वताए ।

कार्यक्रममा नाटोजका अध्यक्ष शिव अधिकारीले अहिलेकै अवस्थामा पर्यटकको संख्यात्मक बृद्धिको भाषणबाजी गर्नुको कुनै तुक नहरेको बताउँदै त्यसका लागि आधार तयार गर्नुपर्नेमा जोड दिनुभयो । 

सो कार्यक्रममा निर्विरोध रुपमा निर्वाचित नाटोज नयाँ कार्यसमितिलाई पूर्व सञ्चारमन्त्री सापकोटा र नेपाली कांग्रेसका युवा नेता प्रदिप पौडेलले माला र अविर लगाएर बधाई तथा शुभकामना दिएका थिए । 

गन्तव्य नेपाल गु्रपका शिव अधिकारीको अध्यक्षतामा निर्विरोध निर्वाचित नयाँ कार्यसमितिको उपाध्यक्षहरुमा प्रदेश नम्बर १ बाट शिखरपोष्ट मिडियाका प्रकाश खालिङ, प्रदेश नम्बर २ बाट राष्ट्रिय समाचार समितिका विकास लोहनी, प्रदेश नम्बर ३ बाट राजधानी दैनिकका मधुजंग पाण्डे, प्रदेश नम्बर ४ बाट रेडियो जननीका विमला भण्डारी, प्रदेश नम्बर ५ बाट रेडियो नेपालका भुषण पोखरेल, प्रदेश नम्बर ६ बाट न्यूज २४ टेलिभिजनका संगम बानियाँ र प्रदेश नम्बर ७ बाट दि राईजिङ नेपाल दैनिकका नारायण उपाध्यय निर्विरोध निर्वाचित भएका छन ।

त्यस्तै महासचिवमा अर्थ र व्यापार साप्ताहिकका नविन काफ्ले, उपमहासचिवमा राससका सिवी अधिकारी, सचिवमा शिखरन्यूज डटकमका सुजन पन्त, कोषाध्यक्षमा मेगा टेलिभिजनका कल्पना महर्जन, सहकोषाध्यक्षमा ईआर्थिक डट कमका तिर्सना  तथा नयाँ कार्यसमितिको सदस्यहरुमा चक्रपथ डट कमका कविता अधिकारी, सगरमाथा टेलिभिजनका श्रीकृष्ण सुवेदी, न्यूजसेवा डटकमका विष्णु पोखरेल, अर्थको अर्थ डट कमका शंकर पण्डित, नेपाल समाचारपत्र दैनिकका दिपेन्द्र थापा, इमेज टेलिभिजनका भरत केसी, फोटो पत्रकार जनार्दन अर्याल र जनतापोष्ट डट कमका किरण बुढाथोकी निर्वाचित भएका छन ।

कार्यक्रममा  पर्यटन धरोहर अवार्डबाट बरिष्ठ पर्यटन व्यवसायी तथा पाटा नेपाल च्याप्टरका निवर्तमान अध्यक्ष सुमन पाण्डेलाई प्रदान गरियो । त्यस्तै माउन्टेन डिलाईट्स टे«क्स एण्ड एक्स्पीडिसनका प्रवन्ध निर्देशक समेत रहेका टुरिजम म्यान अफ दि इयर २०१७ कमल सापकोटा, हिमालयन कैलास ट्राभल्स एण्ड टुर्सका प्रवन्ध निर्देशक टासी गुरुङ, डिके ट्राभल्स एण्ड टुर्सका प्रबन्ध निर्देशक दिपेन्द्र कुमार घिमिरे, लिभिङ एडभेन्चर टुर्स एण्ड ट्राभल्सका प्रबन्ध निर्देशक अनिल लामा, बरिष्ठ टुरिष्ट गाइड विष्णु ज्ञवाली र गायिका रानु निरौला लाई सम्मानित गरिएको थियो । 

त्यसैगरी नाटोजले हरेक वर्ष दिदै आएको दश हजार धनराशी सहितको नाटोज पर्यटन पत्रकारिता सम्मान २०७४ बाट रेडियो नेपालका निर्देशक गोविन्द चिमोरियालाई सम्मानित गरिएको थियो ।