१३ फागुन/ अर्थ र व्यापार - नबिल बैंकको  फागुन ५ गते सम्पन्न बैंक सञ्चालक समितिको बैठकले ३४ औं वार्षिक साधारण सभाका लागि फागुन १४ गते शेयरधनी दर्ता पुस्तिका बन्द गर्ने मिति तोकेको छ । यसअनुसार सोमबारसम्म कायम शेयरधनीले मात्र बोनस पाउनेछन् । फागुन १२ गते आइतबार बैंकको शेयरमूल्य प्रतिकित्ता ७९५ रुपैयाँमा कारोबार भएको छ ।

साधारण सभाको बुकक्लोज सम्बन्धी जानकारी बुकक्लोज हुने दिनभन्दा ७ दिनअघि नै जानकारी गराउनुपर्ने नगराउँदा बैंकलाई नेप्सेले स्पष्टिकरण सोधेको थियो । नबिल बैंकले फागुन २७ गते सोमबार नेपाल प्रज्ञा प्रतिष्ठान कमलादीमा साढे ११ बजे ३४ औं वार्षिक साधारण सभा डाकेको छ । बैंकले निकै ढिलो गरि गत आर्थिक वर्षको साधारण सभा आह्वान गरेको हो । यसअघिका वर्षहरुमा बैंकले पहिलो त्रैमासमा नै साधारण सभा सम्पन्न गर्दै आएकोमा गत आवको साधारण सभा भने तेस्रो त्रैमासमा धकेलिएको हो ।

सभाले बैंक सञ्चालक समितिले प्रस्ताव गरिको २२ प्रतिशत नगद तथा १२ प्रतिशत बोनस सहित कूल ३४ प्रतिशत लाभांश पारित गर्नेछ । साधारण सभाका लागि बैंकले फागुन १४ गते शेयरधनी दर्ता पुस्तिका बन्द गर्ने भएको छ । यस्तै संस्थापक शेयरधनी एनआईडिसी डेभलपमेन्ट बैंकले यसअघि बिक्री गरेको १० प्रतिशत ( ८० लाख ३७ हजार २९ कित्ता) शेयर संस्थापक शेयरलाई साधारण शेयरमा परिणत गर्ने प्रस्ताव पनि अनुमोदन गर्दैछ । बैंकले सो शेयर रुपान्तरण गर्न नियामक निकाय राष्ट्र बैंकबाट स्वीकृती प्राप्त भैसकेको जनाएको छ ।