२१ असोज/अर्थ र व्यापार– काठमाडौं महानगरपालिकाले असोज १ गतेदेखि सुरु गरेको राजस्व निर्धारण तथा संकलन अनलाइन प्रणाली प्रभावकारी देखिएको छ । 

अनलाइन प्रणाली मार्फत एक महिना नबित्दै काठमाडौं महानगरपालिकाले पाँच करोड ५० लाख रुपैयाँ राजश्व असुल गर्न सफल भएको छ । अनलाइन प्रणालीको विकास सांग्रिला इन्फरमेटिक्सले गरेको हो ।

कामपाले शुरुआती चरणमा १० वटा वडाबाट सुरु गरेको अनलाइन प्रणाली यही १३ गतेदेखि सबै वडाबाट सञ्चालनमा ल्याइएको थियो । कामपाको सबै वडामा अनलाइन प्रणाली सञ्चालनमा आएपछि सेवाग्राहीलाई पनि सहज भएको छ ।

राजस्व संकलनमा पारदर्शी नभएको आरोप खेप्दै आएको कामपालाई अनलाइन प्रणाली सञ्चालनमा आएपछि राजस्व संकलन कार्यमा भएको प्रभावकारीता नै आरोपको जवाफ भएको कामपा राजस्व विभागका निर्देशक शिवराज अधिकारीले बताए ।

अनलाइन कर प्रणालीमा पब्लिक र कोर पोर्टल गरी दुईवटा प्लेटफर्म रहेका छन् । सेवाग्राहीले पब्लिक पोर्टलका फिचर प्रयोग गर्न सक्छन् । पब्लिक पोर्टलका फिचर मार्फत करदाताले महानगरलाई बुझाउनुपर्ने करको प्रारम्भिक मूल्यांकन आफैंले घरमै बसेर गर्न सक्ने सुविधा छ । 

करदातासँग सम्बन्धित र सोधिएका र माग गरिएका विवरण भरेपछि प्रणाली आफैंले करको प्रारम्भिक मूल्यांकन गरी तिर्नुपर्ने राजस्वको अंक देखाउँछ ।