९ चैत्र / अर्थ र व्यापार- कैलाश हेलिकप्टर सर्भिसेज प्रा.लि.ले भोलि चैत १० गते शनिबार काठमाडौं– लुक्लाको उडान मार्फत व्यावसायिक उडान सुरु गर्ने भएको छ । नागरिक उड्ड्यन प्राधिकरणले शुक्रबार संचालन अनुमति (एओसी) प्रदान गरेकोले अब व्यवसायिक उडान सञ्चालन गर्न लागिएको कम्पनीको निर्देशक सि.एन. पाण्डेले अर्थ र व्यापारलाई बताए ।

कैलाश हेलिकप्टर सर्भिसेजले एयर बसद्धारा निर्मित नयाँ एएस ३५० बी ३ इ जहाज (९एन–एएमएल) हेलिकप्टर खरिद गरी नेपाल ल्याईसकेको छ । यस हेलिकप्टरले २३ हजार फिटसम्म उडान गर्ने क्षमता राख्छ । कैलाश हेलिकप्टरमा हवाई र पर्यटन क्षेत्रसँग सम्बन्धित व्यवसायी सहित बैंकर, उद्योगी लगायतको लगानी रहेको छ । पहिलो चरणमा करिब ३० करोड रूपैयाँ लगानी रहेको र नयाँ जहाज थपसँगै लगानी विस्तार गर्दै जाने तयारी भएको कम्पनीले जनाएको छ ।

कम्पनीले विरामीको तत्काल उपचारका लागि गन्तव्य सम्म पु¥याउने, कर्पोरेट फ्लाइट, ह्युमन र कार्गो स्लीङ अपरेसन्स, हाइअल्टिच्युट अपरेसन, एरियल सर्भे, दृश्यावलोकन, माउन्टेन फ्लाइट, स्पेशल एडभेञ्चर मिसन, फिल्मिङ, स्काइ डाइभिङ, प्राकृतिक प्रकोप उद्धार जस्ता विस्तृत हेलिकप्टर सेवा सञ्चालन गरिने जनाएको छ ।