३ फागुन /अर्थ र व्यापार - स्थानीय भत्ता, महँगी भत्ता, फिल्ड भत्ता र अन्य भत्ता सहित गरेर सरकारी कर्मचारीले चालु आर्थिक वर्षको पहिलो सात महिनामा सरकारी कर्मचारीले पाँच अर्ब ६ करोड रुपैयाँ अतिरिक्त सुविधा भत्ता बुझेका छन् ।

सात महिनामा सरकारी कर्मचारीले ४५ अर्ब ७४ करोड रुपैयाँ तलब सरकारबाट बुझेका छन् । कर्मचारीले तलबबाहेक बुझेको यो अतिरिक्त सुविधा रकम सात महिनामा वितरित कूल तलबको ११ प्रतिशत रकम हो । 

महालेखा नियन्त्रकको कार्यालयका अनुसार कर्मचारीले सबैभन्दा धेरै महँगी भत्ता लिएका छन् । सरकारी कर्मचारीलाई ३ अर्ब १३ करोड ३० लाख रुपैयाँ महँगी भत्ता उपलब्ध गराइएको छ । यसैगरी अन्य भत्ताका नाममा १ अर्ब ५३ करोड रुपैयाँ वितरण भएको कार्यालयले तयार गरेको विवरणमा उल्लेख गरिएको छ ।

कार्यालयका अनुसार स्थानीय भत्ताबापत कर्मचारीले ३९ करोड २३ लाख रुपैयाँ सरकारबाट बुझेका छन् । यो अवधिमा सबैभन्दा थोरै फिल्ड भत्ता कर्मचारीले बुझेका छन् । फिल्ड भत्तामा ५९ लाख रुपैयाँ खर्च भएको छ । महालेखा नियन्त्रकको कार्यालयले माघसम्ममा सरकारले वितरण गरेको तलब तथा भत्ताको विवरण तयार गरेको हो ।