२ श्रावण / अर्थ र व्यापार- विदेशमा रहेर समस्यामा परेका नेपाली र नेपालमा रहेका विदेशी नागरिकहरुलाई आफ्नो देश फर्काउन सरकारले केहि एयरलाईन्सहरुलाई अनुमति दिने निर्णय गरेपश्चात पुनः आफ्नै निर्णय विरुद्ध थप एयरलाईन्सहरुलाई चार्टर अनुमति प्रदान गरेको छ । 

यसअघि सिसिएमसिले १५ देखि २२ जुलाई सम्म नेपाल वायुसेवा निगम,हिमालयन एयरलाईन्स,एयर अरेविया,फ्लाई दुर्व,जजिरा–२ र मालिन्दो एयरलाईन्सलाई अनुमति दिएको भएपनि यसविचमा नेपाल नागरिक उड्ड्यन प्राधिकरणले आफ्नै निर्णय विपरित बिहिवार टर्किस एयरलाईन्स र कतार एयरवेजलाई पुनः अनुमति प्रदान गरेको हो । प्राधिकरणले बिहिवार आफ्नै निर्णय विपरित जुलाई १८ तारिखका लागी चार्टर अनुमति प्रदान गरेको हो ।

यसअघि चार्टर उडानका नाममा ट्राभल एजेन्सि सञ्चालक र एयरलाईन्सका नेपाल प्रतिनिधिहरुको मिलोमतोमा अत्यन्तै बढि शुल्क उठाएकोमा व्यापक विरोध भएपछि  पर्यटन, सस्कृति तथा नागरिक उड्ड्यमन्त्री योगेश भट्टराईले उद्दारका क्रममा कुनै पनि ट्राभल एजेन्सीले अस्वभाविक भाडा लिएको पाइएमा लाइसेन्स खारेज गर्ने बताएका थिए ।

पछिल्लो समय सरकारले विदेशमा अलपत्र परेका श्रमिकहरुको सन्दर्भमा बाहेक अन्य चार्टर फ्लाईटहरु गर्न नदिने निर्णय गरेको भए पनि केहि एयरलाईन्सहरुले चार्टर फ्लाईटको अनुमति पाउन सफल भएका छन । “विदेशी एयरलाईन्सका नेपाल प्रतिनिधि र केहि ट्राभल एजेन्सि सञ्चालकहरुले परराष्ट्र मन्त्रालय र दुतावासहरुको दुरुपयोग गर्दै चार्टर फ्लाईटको अनुमति दिन सफल भएका छन, यसमा उनीहरु दोब्बर भन्दा बढि भाडा असुल अझै पनि गरिरहेका छन”–एक ट्राभल एजेन्सिका सञ्चालकले अर्थ र व्यापारलाई वताए ।

नेपालका ट्राभल एजेन्सि सञ्चालकहरुले चार्टर फ्लाईटको नाममा विदेशी एयरलाईन्सका नेपाल प्रतिनिधि र केहि ट्राभल एजेन्सि सञ्चालकहरुको मिलोमतोमा यात्रुहरुलाई दोब्बर–तेब्बर भाडा असुली ठगि गरिएको भन्दै पर्यटन मन्त्रालयको ध्यानाकर्षण गराएपनि यसमा सुनुवाई हुन सकेको छैन । सामान्यतया टु वे को भाडा ८ सय देखि १२ सय डलर रहेकोमा हाल ट्राभल एजेन्सिहरुले यसमा दोब्बर भाडा असुली रहेका छन ।