२५ असार / अर्थ र व्यापार – देशभरका स्थानीय तहले आफ्नो पहिलो बजेट आज सार्वजनिक गर्दैछन् । स्थानीय तहका प्रमुखले आज आफ्नो तहको बजेट सम्बन्धित समितिमा पेश गर्नेछन् । स्थानीय तहमा वर्षभरि हुने चालु खर्च, पुँजीगत खर्च, वित्तीय व्यवस्थापन, स्थानीय राजस्व तथा सरकारले दिने आम्दानीका स्रोतसहितको बजेट हुनेछ ।

स्थानीय तहरुले संघीय मामिला तथा स्थानीय विकास मन्त्रालयको निर्देशन अनुसार असार २५ गते पहिलो बजेट स्थानीय व्यवस्थापिकामा पेस गर्न लागेका हुन् । सम्बन्धित गाउँ र नगर सभामा पेस भएको बजेट असार मसान्तसम्म पास गरिसक्नुपर्ने निर्देशनमा उल्लेख छ । तर आजै बजेट ल्याउनु बाध्यकारी नभएकाले एक, दुई दिन पछि बजेट पेश गरे पनि हुने भएको छ ।

स्थानीय तहको चुनाव नभएका र स्थानीय व्यवस्थापिका गठन नभएका तहमा भने काम चलाउन बजेट प्रस्तुत गर्नुपर्ने भएको छ । काठमाडौ महानगरपालिकाले भने असार ३० गते बजेट प्रस्तुत गर्नेछ ।