२९ जेठ / अर्थ र व्यापार-सरकारलाई संसदको विकास समितिले अबको दुई महिनाभित्र हरेक स्थानीय तहमा वाणिज्य बैंकको शाखा स्थापना गर्न निर्देशन दिएको छ । 

सोमबार बसेको समितिको बैठकले स्थानीय तहको आर्थिक क्रियाकलापलाई व्यवस्थित गर्न हरेक स्थानीय तहमा कम्तिमा एउटा वाणिज्य बैंकको शाखा स्थपना गनुपर्छ भनेको हो ।

समितिले आगामी २ महिनाभित्र बैंक स्थापना गर्न सरकार, अर्थ मन्त्रालय र नेपाल राष्ट्र वैंकलाई निर्देशन दिएको हो ।
आगामी आर्थिक बर्षको बजेटमा समेत स्थानीय तहमा बजेट निकासा गर्न वाणिज्य बैंकहरुको शाखा अनिवार्य खोल्ने व्यवस्था गरिएको छ । 

यसअघि नै राष्ट्र बैंकले सबै वाणिज्य बैंकहरुलाई शाखा नपुगेका स्थानीय तहमा शाखा पुर्याउन परिपत्र जारी गरिसकेको छ ।
समितिको निर्देशन अनुसार अब वाणिज्य बैंकहरुले आगामी दुई महिनाभित्र ३५२ वटा स्थानीय तह (गाउँपालिका तथा नगरपालिका)मा शाखा विस्तार गर्नु पर्ने भएको छ । 

अर्थमन्त्रालयका अनुसार ७४४ स्थानीय तह मध्ये हालसम्म ३९२ वटा स्थानीय तहमा मात्र ‘क’ वर्गको बैंक शाखा संचालनमा रहेका छन ।