१२ कात्तिक/अर्थ र व्यापार – सुनको भाउ अकासियर शनिबार नयाँ रेकर्ड कायम गरेको छ । निरन्तर उकालो लागेको बहुमुल्य बस्तु छापावाल सुनको मूल्य शनिबार बढेर प्रतितोला १ लाख १७ हजार रुपैयाँ पुगेर अहिलेसम्मकै नयाँ रेकर्ड कायम गरेको हो ।
नेपाली बजारमा शनिबार मात्र १ हजार रुपैयाँले सुनको भाउ बढेको नेपाल सुन चाँदी व्यावसायी महासंघले जनाएको छ ।
महासंघका अनुसार शनिबार प्रतितोला छापावाल सुनको मुल्य १ लाख १७ हजारमा कारोबार भएको थियो । यसैगरी, तेजावी सुन प्रतितोला १ लाख १६ हजार ४५० रुपैयाँमा र चाँदी प्रतितोला १ हजार ४१५ रुपैयाँमा कारोबार भएको थियो ।
दसैं बिदापछि शुक्रबार खुलेको बजार मुल्य अनुसार प्रतितोला छापावाल सुनको मूल्य १ लाख १६ हजार रुपैयाँ रहेको थियो। शुक्रबारको तुलनामा शनिबार १ हजार रुपैयाँले भाउ बढेको महासंघले जनाएको छ । महासंघले जानकारी गराए अनुसार यसअघि असोज महिनाको सुरुवाती दिनमा भाउ बढेर १ लाख सातहजार रुपैयाँसम्म आइपुगेको सुन शनिबार अत्यधिक बढेर प्रतितोला १ लाख १७ हजार रुपैयाँ कायम भएको हो।
हाल विश्वभर नै सुनको माग बढिरहँदा नेपाली बजारमा पनि सुनको भाउ अत्यधिक बढेर यस्तो नयाँ रेकर्ड कायम गरेको हो । विशेषगरि गरगहनामा प्रयोग गरिने पहेंलो बहुमल्य बस्तु सुनमा नेपाली उपभोक्ताले धेरै खर्च गर्दै आएका छन ।
आर्थिक मन्दिका कारण हाल लगानीको अन्य आधार कमजोर हुदैं जाँदा सुनमा लगानी सुरक्षित मानिदै आएको सुन कारोबारमा संलग्न व्यवसायीहरुले बताउँदै आएका छन ।
नेपाली उपभोक्ताले विशेषगरि तिज, बिबाहको मौसम र लक्ष्मीपुजाको अवसरमा सुनका गरगहनामा लगानी गर्दै आएका छन । दसैं सकिएर अब तिहार आउन लागेको र विस्तारै मंसिरको बिबाहको मौसम पनि सुरु हुन लागेकाले अहिले बजारमा सुन कारोबार हुनेबेला यसरी अत्यधिक रुपमा बढेको सुनको बजार भाउले उपभोक्ता थप मारमा पर्ने सुन चाँदी व्यावसायी महासंघले जनाएको छ ।