११ पुुस/अर्थ र व्यापार – नवनियुक्त प्रधानमन्त्री पुष्पकमल दाहाल ‘प्रचण्ड’ ले तिन उपप्रधानमन्त्री सहित ८ सदस्यीय नयाँ मन्त्रिपरिषद गठन गरेका छन् । प्रधानमन्त्री दाहालले सोमबार आफुले राष्ट्रपतिसमक्ष सपथग्रहण गरेसँगै तिन उपप्रधानमन्त्री र ४ मन्त्रीसहित ८ सदस्यीय मन्त्रिपरिषद गठन गरेका हुन् ।
उपप्रधानमन्त्रीमा नेकपा एमालेका बरिष्ठ नेता विष्णु पौडेल, माओवादी केन्द्रका बरिष्ठ नेता नारायणकाजी श्रेष्ठ र राष्ट्रिय स्वतन्त्र पार्टीका अध्यक्ष रवि लामिछाने रहेका छन् । पौडेलले अर्थ, श्रेष्ठले भौतिक पूर्वाधार र लामिछानेले गृह मन्त्रालय सम्हाल्नेछन् ।
अन्य नयाँ मन्त्रीहरुमा ज्वालाकुमारी साह, दामोदर भण्डारी, राजेन्द्र राई र अब्दुल खान रहेका छन् । उनीहरुको कार्यभार पछि तोकिने बताईएको छ । नवनियुक्त ३ जना उपप्रधानमन्त्री र चारैजना मन्त्रीले सोमबार नै शपथ लिएका छन् । नेकपा (माओवादी केन्द्र) का अध्यक्ष दाहाल नेतृत्वको नवगठित मन्त्रिपरिषद्को पहिलो बैठक आजै (साेमबार) बस्दैछ।