२४ चैत /अर्थ र व्यापार – यसअघि लगातार बढिरहेको अवस्थामा सरकारले फेरि इन्धनको भाउ बढाएको छ । सात समुन्द्र पारिको रुस युक्रेन युद्धलाई बहाना बनाएर व्यापारिले हरेक वस्तुको भाउ बढाईरहेको बेलामा अहिले खाना पकाउने ग्यासमा पनि प्रति सिलिन्डर २५ रुपैयाँले भाउ बढाईएको छ ।
नेपाल आयल निगमले पेट्रोलियम पदार्थको मूल्य पुनः बढाएको हो । निगमले पेट्रोल, डिजेल र मट्टितेल प्रतिलिटर ५ रुपैयाँका दरले मूल्य बढाएको छ । अब काठमाडौं उपत्यकामा पेट्रोल प्रतिलिटर १६० रुपैयाँ तथा डिजेल र मट्टितेल प्रतिलिटर १४३ रुपैयाँ पुगेको छ ।
खाना पकाउने एलपी ग्यासको मूल्य प्रतिसिलिण्डर २५ रुपैयाँ बढाएर १६ सय कायम गरिएको छ। यस अघि खाना पकाउने ग्यासको मूल्य प्रतिसिलिण्डर १५ सय ७५ रुपैयाँ रहेको थियो ।
बढेको मूल्य गएराति १२ बजेदेखि लागू भएको निगमले जनाएको छ। यस्तै हवाई इन्धन आन्तरिकमा ५ रुपैयाँ बढेर प्रति लिटर १५६ रुपैयाँ कायम भएको छ । यस्तै हवाई इन्धन अन्तर्राष्ट्रिय अमेरिकी डलर ५० ले बढेर प्रतिकिलोलिटर अमेरिकी डलर १ हजार ५ सय ४५ कायम गरिएको छ । यसअघि निगमले चैत २ गते पनि पेट्रोलियम पदार्थको मूल्य बढाएको थियो।
अन्तर्राष्ट्रिय बजारमै मूल्यवृद्धि भएकाले पेट्रोलियम पदार्थको मूल्य बढाइएको निगमको भनाइ छ । उता निगमले ठूलो घाटा बेहोर्नु परेको भन्दै स्वचालित मूल्य प्रणाली बनाउने तयारी गरेको छ । यसो गरे इन्धनको मूल्य थप बढ्ने छ ।