२२ चैत/अर्थ र व्यापार – बहुप्रतिक्षित चोभार सुख्खा बन्दरगाह मंगलबारदेखि सञ्चालनमा आएको छ । वीरगञ्जबाट डिजिटल लक लगाएर आएको मालबाहक कन्टेनर बन्दरगाहमा प्रवेश गराई प्रधानमन्त्री शेर बहादुर देउवाले उद्घाटन गरेका हुन् ।
यसअघि केही नीतिगत व्यवस्था मिलाउने कार्यमा भएको ढिलाईका कारण गत असारमा निर्माण सम्पन्न भएको चोभारको सुख्खा बन्दरगाह हालसम्म सञ्चालनमा आउन सकेको थिएन । काठमाडौंका व्यवसायीको आयात तथा निर्यात सहजीकरणका लागि चोभारमा सुख्खा बन्दरगाह सञ्चालनमा ल्याईएको हो ।
हाल बन्दरगाहमा आवश्यक भन्सार कार्यालय, क्वारेन्टाइन, बैंक लगायत सबै पूवाधारजन्य निकाय आइसकेको नेपाल इन्टरमोडल यातायात विकास समितिले जनाएको छ । सो समितिका कार्यकारी निर्देशक आशिष गजुरेले यस्तो जानकारी गराएका हुन ।
विश्व बैंकको ऋण सहयोगमा बनेको बन्दरगाहको लागत एक अर्ब ५३ करोड रूपैयाँ हो । दुई सय २० रोपनी क्षेत्रफलमा निर्माण भएको यस बन्दरगाहमा पाँचसय ट्रक पार्किङ गर्न सकिन्छ । यसैगरि, परियोजना अन्तर्गत पाँच वटासयसम्म कन्टेनर राख्न मिल्नेगरी यार्ड बनाइएको छ ।
समितिका निर्देशक गजुरेलका अनुसार यो बन्दरगाहमा चारवटासम्म कन्टेनर खप्टिएर राख्न सकिने गरी कन्टेनर यार्ड बनाइएको छ । बन्दरगाहमा सवारी साधन प्रवेशकालागि ठूला तीनवटा गेट बनाइएको छ । यसैगरि, बन्दरगाह क्षेत्र बाहिरको सडकसमेत सुधार गरिएको छ ।