२० फागुन/अर्थ र व्यापार– सरकारले पुनः पेट्रोलियम पदार्थको मूल्य भारी दरमा बढाएको छ । बिहीबार बसेको नेपाल आयल निगम सञ्चालक समितिको बैठकले डिजल, पेट्रोल र मट्टितेलको मूल्य प्रतिलिटर ५ रुपैयाँले बढाउने निर्णय गरेको हो ।
अहिले खाना पकाउने ग्यासको मूल्य भने बढेको छैन । निगमले अन्तर्राष्ट्रिय बजारमा कच्चा तेलको मूल्यमा भएको वृद्धिले घाटाकोदर ह्वात्तै बढेको भन्दै एकैपटकमा प्रतिलिटर ५ रुपैयाँका दरले मूल्य बढाएको हो ।
अब पेट्रोलको मूल्य प्रतिलिटर १५० रुपैयाँ पुगेको छ । यसैगरि, डिजल र मटितेलको मूल्य प्रतिलिटर १३३ रुपैयाँ भएको छ ।
आयल निगमले खाना पकाउने ग्यासमा प्रतिसिलिन्डर ६६५.३४ रुपैयाँ घाटा भइरहे पनि नबढाउने निर्णय लिएको छ । हवाई इन्धनको मूल्य पनि समायोजन भएको छ ।
यो मूल्य समायोजनपछि पनि निगमलाई १५ दिनमा २ अर्ब ५० करोड घाटा हुने निगमका सह–प्रवक्ता पुष्कर कार्कीले बताए ।
फागुनसम्म मात्रै निगमलाई २८ अर्ब नोक्सानी हुने देखिएको निगमले जनाएको छ । निगम सञ्चालक समितिले हाल निगममा आर्थिक संकट गहिरिएको भन्दै आफ्ना कर्मचारीलाई यसअघि दिँदै आएको पोशाक संरक्षण खर्च कटौती गर्ने निर्णय पनि गरेको जनाएको छ ।