१४ साउन/अर्थ र व्यापार– सर्लाहीका उखु किसानहरुले चिनी मिलबाट आफ्ना बक्यौता भुक्तानी नपाएको भन्दै पुनः आन्दोलन गर्ने चेतावनी दिएका छन् ।
बिहीबार काठमाडौंमा पत्रकार सम्मेलन गर्दै उखु किसान संघर्ष समिति सर्लाही, राष्ट्रिय कृषि श्रमिक संघ र उखु किसानहरुले विगतमा भएको सहमति पालना नभएको भन्दै भदौ ५ गतेसम्म बक्यौता भुक्तानी गर्न अल्टिमेटम दिएका हुन् ।
उखु किसान संघर्ष समिति एवं नेपाल सरकार उद्योग मन्त्रालयबीच २०७७ साल पौष १३ गते दोस्रो पटक भएको पाँचबुँदे सहमति अनुसार २१ दिनभित्र उखु किसानहरुको सम्पूर्ण बाँकी बक्यौता रकम उद्योग मन्त्रालयले भुक्तानी गराउन जिम्मेवारी लिएको थियो। तर उखु किसानहरुको सम्पूर्ण बाँकी बक्यौता रकम भुक्तानी नपाएको उखु किसान संघर्ष समितिले जनाएको छ ।
किसानहरुलाई कमजोर, निमुखा सम्झेर फेरि पनि रकम नदिने षड्यन्त्र उद्योगी र सरकारबाट भएको भन्दै भदौ ५ गतेसम्म बक्यौता भुक्तानी नपाए पुनः काठमाडौं केन्द्रित आन्दोलन गर्ने चेतावनी किसानहरुले दिएका छन् ।
तपाईको प्रतिक्रिया