१३ साउन/अर्थ र व्यापार– महानगरलाई कर नबुझाउने २० ठूला करदाताको घर र कार्यस्थलमा राजस्व विभागले बुधबार माइकिङ गरेका छन् ।

राजस्व अधिकृत प्रदीप कोइरालाको नेतृत्वमा नगर प्रहरीसहित गएको टोलीले महानगरलाई कर नबुझाउने २० ठूला करदाताको घर र कार्यस्थलमा माइकिङ् गर्नुका साथै शिलबन्दी गर्ने तथा सरकारी बाँकी सरह राजस्व असुली गर्ने सम्बन्धी सूचना टाँस गरिएको हो ।

टोलीले आज वडा एनआरटी क्लब, युनाइटेड वर्ल्ड ट्रेड सेन्टर, बागमती च्याम्बर, बुद्धबारी कम्प्लेक्स, काठमाडौँ इञ्जिनियरिङ कलेज, नेपाल रेडक्रस सोसाइटीमा माइकिङ् गर्ने र सूचना टाँस गरेको छ ।

गएको असार १६ गते कर तिर्न आउनका लागि विभागले ३० दिने सार्वजनिक सूचना जारी गरि कर तिर्न दिएको म्याद साउन १५ गते सकिँदैछ ।

राजस्व विभागका प्रमुख डा. शिवराज अधिकारीले सम्पर्कमा ल्याउन धेरै प्रयास गर्दा पनि विवरणसम्म नबुझाएको बताए । उनले कुल २० करदातामध्ये एनआरटी क्लव, काठमाडौं इञ्जिनियरिङ कलेज, देवेन्द्र श्रेष्ठ मात्र सम्पर्कमा आएको जानकारी दिए ।

विभागका प्रमुख डा.अधिकारीले करदाताले आफू सम्बन्धी विवरण नबुझाएका कारण यकिन अङ्क भन्न कठीन भएपनि करीव ७० करोड रुपैयाँ बढी राजस्व प्राप्त गर्ने अनुमान गरेको जानकारी दिए ।

महानगरलाई कर नबुझाउने अन्य करदाताहरुमा मनमोहन मेमोरियल कलेज एण्ड शिक्षण अस्पताल, देवेन्द्र श्रेष्ठ, आदर कम्प्लेक्स, कृषि सामाग्री संस्थान, एलआरआई स्कूल, कान्तिपुर डेन्टल अस्पताल, चिरायु अस्पताल हुन् ।

यसैगरी, काठमाडौं प्लाजा, नेपाल सेयर मार्केट, आरबी कम्प्लेक्स, सुरज आर्केट, शुभश्री कोअपरेटिभ लिमिटेड, स्टार मल र गोपालजी प्रपर्टिज प्रालि.रहेका छन् ।