२४ मंसिर/अर्थ र व्यापार– नाडा अटोमोबाईल्स एशोसिएशन अफ नेपाल (नाडा)को अध्यक्षमा पोखराका व्यवसायी धुर्वबहादुर थापा विजयी भएका छन् । थापा फोर्स मोटरको नेपालको आधिकारिक बिक्रेता तथा हिमालय अर्गनाइजेसनका अध्यक्ष हुन । उनले अध्यक्षका प्रत्यशी करण चौधरीलाई ६६ मतान्तरले पराजित गर्दै आगामी २ वर्षका लागि नाडाको नयाँ अध्यक्षमा निर्वाचित भएका हुन ।
गत बुधबार र बिहीबारदेखि काठमाडौँमा सञ्चालित नाडाको ४५औँ वार्षिक साधारणसभापछि सम्पन्न भएको निर्वाचनको अन्तिम मतगणना अनुसार अध्यक्षमा विजयी थापाले कुल १४ सय १३ मत ल्याउँदा अर्का प्रत्यासी चौधरीले १३ सय ४७ मत प्राप्त गरेका थिए । 
यो निर्वाचनबाट अध्यक्षमा थापा निर्वाचित भएपनि अन्य पदाधिकारीहरुमा चौधरी समुहले नै बहुमत ल्याएका छन् । एक जना अध्यक्षसहित नाडाको कुल १७ कार्यसमिति सदस्य मध्येमा चौधरी समुहबाट १२ जना र थापा समुहबाट ५ जना विजयी भएको नाडा निर्वाचन समितिले जनाएको छ ।
नाडा निर्वाचन समितिका अनुसार सदस्यमा करण चौधरीको समुहबाट मिलनबाबु मल्ल १४ सय ६५ मत , अनुप कुमार बराल १४ सय ६३ मत , राजनबाबु श्रेष्ठ १४ सय ५७, सुरेन्द्र कुमार उप्रेती १४ सय ३२, सुनिल रिजाल १४ सय २, अभिक ज्योति १३ सय ८३, प्रकाश कपुरी १३ सय ७९, विक्रम सिंघानियाले १३ सय ७१ मत र गोपाल भट्टराईले १३६५ मत ल्याएर विजयी भएका छन्। यसैगरि, करण चौधरीकै समुहबाट निलमणि पाठक १३ सय ५४ मत , वरदान बस्नेत १३ सय ५० मत र पंकज अग्रवालले १३ सय ३४ मत ल्याई विजयी भएका हुन्। 
नवनिर्वाचित अध्यक्ष  थापाको समुहबाट निराकर श्रेष्ठ १३ सय ६४ मत , यमुना श्रेष्ठ १३ सय ५५ मत , कपिल शिवाकोटी १३ सय ४८ मत , प्रदिपमान प्रधान १३ सय ४६ मत र आकाश गोल्छा १३ सय ३९ मत ल्याएर विजयी भएका छन् । कुल ३२ सय १६ मतदाता सदस्य रहेको नाडाको सो निर्वाचनमा जम्मा २७ सय ८८ मत मात्र खसेको थियो । यो निर्वाचनमा थापा र चौधरीको समुहबाट केन्द्रिय सदस्यकालागि १७ / १७ जना गरि ३४ जना व्यवसायीबीच प्रतिस्पर्धा भएको थियो ।  अन्य व्यवसायी मतदान गर्न सहभागी नै नभएको नाडा निर्वाचन समितिले जनाएको छ ।