३ साउन/अर्थ र व्यापार– सरकारले रेल खरिद गरेको करिब एक वर्षपछि जनकपुर–जयनगर रेल्वे लिकको ‘स्पिड’ र ‘सर्टिफिकेसन’ जाँच गरिएको छ ।

भारतको इस्ट–सेन्ट्रल रेल्वेको डिजल लोकोमोटिभ रेलले जयनगरदेखि कुर्थासम्म प्रतिघण्टा १२० किलोमिटरको गतिमा ‘ट्रयाक स्पिड’ परीक्षण गरेको हो ।

हाल जनकपुर–जयनगर–कुर्थासम्म ३४ किलोमिटरमा सञ्चालन हुने यो रेलको एक हजार ३०० सिट क्षमता रहेको छ । सरकारको महोत्तरीको बिजलपुरा हुँदै बर्दिबाससम्म रेल चलाउने योजना छ । 

नेपाल सरकारले एक वर्षअघि ८४ करोड ६५ लाख रूपैयाँमा दुई सेट रेल खरिद गर्न भारतीय कोंकण रेलवे कर्पोरेशनसँग सम्झौता गरेको थियो । गत असोजमा नेपाल रेल्वेलाई दुवै रेल हस्तान्तरण गरिएको थियो । रेल संचालनका लागि भारतीय कम्पनी कोंकण रेलवे कर्पोरेशनलाई करिब ३५ करोड रुपैयाँमा जिम्मा दिइएको छ ।

रेल विभागका महानिर्देशक दीपककुमार भट्टराईले रेल संचालनका लागि पूर्वाधार, कानुन, ट्रेन सेट, स्ट्याण्डर्ड अपरेटिङ सिस्टम निर्धारण इत्यादि तयारी नपुगेकाले रेल संचालनमा आउनका लागि केही समय लाग्ने बताए ।