१३ भदौ/अर्थ र व्यापार – सत्तारुढ दलबाट नेपाल वायुसेवा निगमलाई निजीकरण गर्नुपर्ने प्रस्ताव आएको छ । विमान चलाउन नसकेर आर्थिक अवस्था निक्कै बिग्रिएको भन्दै मुलुकको राष्ट्रिय ध्वजाबहाक निगमलाई निजीकरण गर्नुपर्ने प्रस्ताव आएको हो।
प्रतिनिधि सभाको अन्तर्राष्ट्रिय सम्बन्ध र पर्यटन समितिको बिहिबार बसेको बैठकमा केही सांसदहरुले निजीकरण नै निगम सुधारको एकमात्र उपाय भएको बताएका छन ।
एमाले सांसद देवीप्रकाश भट्टचन र राप्रपाका पशुपतिशमशेर जबराले निजी क्षेत्रका वायुसेवा प्रदायक कम्पनीको विमान ग्राउण्डेड भएको कहिल्यै सुन्नु नपर्ने तर, निगमको एउटै विमान पाँच महिनासम्म किन मर्मत सम्भार हुन सक्दैन भनेर प्रश्न गरे।
‘हिमालयन एरलाइन्समा समस्या आएको कहिले सुन्नु भएको छ? त्यसैले निगम पनि निजी क्षेत्रलाई पो दिने हो कि,’ सांसद भट्टचनले भने,‘निगमको समस्या तपाइँ हामी सबैलाई थाहा छ । अहिलेकै अवस्थामा निगममा सुधार सम्भव देखिंदैन। संधै मिटिङ बोलाउने र प्रश्न सोध्ने गरेर निचोडमा पुगिंदैन। उहाँहरुले के जवाफ दिनु हुन्छ भन्ने पनि हामीलाई थाहा छ। त्यसैले निगमलाई निजीकरण गर्नेबारेमा सोचौं।’
अन्तर्राष्ट्रिय सम्बन्ध र पर्यटन समितिको बिहिबार बसेको बैठकमा राप्रपाका सांसद पशुपतिशमशेर जबराले निगमलाई निजीकरण गर्न ढिलाइ गर्न नहुने बताए । ‘अन्तर्राष्ट्रिय उडानभर्ने तीन÷तीनवटा विमान ग्राउण्डेड छन् । एउटा जहाजले कतिवटा गन्तव्यमा उडान भर्ने?,’ उनले प्रश्न गरे, ‘अहिलेको व्यवस्थापनबाट निगममा सुधार नहुने पक्का छ । सरकारले विमान थप्नका लागि पैसा दिन पनि सक्दैन। विमान थपेर अहिलेको व्यवस्थापनले चलाउने ल्याकत नराख्ने कुरा प्रष्ट भइसकेको छ । त्यसैले चलाउने जिम्मा निजी क्षेत्रलाई दिऔं।’ जबराले निजीकरण गरे अहिलेको समस्याको हल हुने दाबी गरे।
‘निजीकरण गरे पुँजीको समस्या हुँदैन। व्यवस्थापन पनि चुस्त हुन्छ। व्यापारका लागि नयाँ नयाँ गन्तव्य खोज्छ,’ उनले भने, ‘हाम्रो भन्दा ठूलो मुलुक भारतले निजीकरण गर्न हुन्छ भने हाम्रोमा किन हुँदैन?’
निगमसँग अन्तर्राष्ट्रिय उडानका लागि २ वटा वाइडबडी र २ वटा न्यारोबडी विमान रहेकामा अहिले एउटा न्यारोबडीबाहेक सबै ग्राउण्डेड छन्। जसका कारण निगमले दैनिक १० करोड रुपैयाँभन्दा बढीको व्यापार गुमाइरहेको छ । एउटा वाइडबडी विमान एक महिनाभित्र सि चेक गर्ने भनेर २ महिनाअघि इटाली पठाइएकामा फर्किने मिति अझै टुंगो लागेको छैन । अर्को वाइडबडी विमान पनि सि चेकका लागि गएराति इटाली नै पठाइएको छ। त्यस्तै एउटा न्यारोबडी विमान बिग्रिएका कारण त्रिभुवन विमानस्थलमा ग्राउण्डेड छ।
पूर्व पर्यटनमन्त्री हितबहादुर तामाङले सि–चेकका लागि २ महिना भन्दा बढी समय लगाउनु स्वाभाविक नभएको बताए । ‘एक महिनामा सि चेक गर्ने भनेर पठाइएको विमान २ महिनामा पनि नबन्नु शंकास्पद छ,’ उनले भने, ‘निजी कम्पनीले बिग्रिनेवित्तिकै बनाइरहेका छन्। तर, निगमको हालत यस्तो छ । त्यसैले निगमको राम्रैसँग अप्रेसन गर्न आवश्यक छ।’
यसैगरी, एमाले सांसद सुनिता बराल र दामोदर पौडेल बैरागीले निगमका अध्यक्ष युवराज अधिकारीलाई विमान किन राम्रोसँग चलाउन नसकेको भनी प्रश्न गरेका थिए । सो प्रश्नमा अधिकारीले चित्तबुझ्दो जवाफ नदिएको सो समितिले जनाएको छ ।